Վերջին օրերին մամուլում անհարկի շահարկվում է դատապարտյալ Շմավոն Գալստյանին` մոր մահվան առիթով կարճաժամկետ մեկնման (արձակուրդի) տրամադրման փաստը, և այդ ամենը փորձում են վերագրել արդարադատության նախարարի անձնական մոտեցմանը:
Այդ լուրերին ի պատասխան` հայտնում ենք, որ դատապարտյալին արձակուրդ տրամադրելու հարցը կարգավորվում է Հայաստանի Հանրապետության Քրեակատարողական օրենսգրքի 80-81-րդ հոդվածների համաձայն: Նույն օրենքի 81-րդ հոդվածով, դատապարտյալին կարճաժամկետ մեկնում տրամադրվում է ուղղիչ հիմնարկի պետի որոշմամբ` հաշվի առնելով դատապարտյալի անձը և նրա դրսևորած վարքագիծը, կատարած հանցագործության աստիճանը: Դիմումը կարող է մերժվել ուղղիչ հիմնարկի պետի պատճառաբանված որոշմամբ:
Տեղեկացնում ենք, որ Շմավոն Գալստյանին կարճաժամկետ մեկնման թույլտվություն` դատապարտյալի նախանշած ժամկետով` երկու ժամ, տրամադրվել է «Էրեբունի» քրեակատարողական հիմնարկի պետի կողմից` հիմք ընդունելով դատապարտյալի դիմումը (դիմումի պատճեն կցված է):
Հաշվի առնելով վերոգրյալը` կարծում ենք, անհարկի շահարկել այդ փաստը և արդարադատության նախարարին անհիմն մեղադրել որևէ անձնական մոտեցման, առավել ևս, օրենքով իրեն չվերապահված պարտականությունների կատարման մեջ, մեղմ ասած կոռեկտ չեն:
Այնուհանդերձ, ավելորդ չեմ համարում մեկ անգամ ևս հավաստիացնել, որ արդարադատության նախարարության աշխատակազմի տեղեկատվության և հասարակայնության հետ կապերի բաժնից ցանկացած լրատվական միջոց մշտապես կարող է ստանալ իրեն հուզող հարցերի հավաստի և ստույգ պատասխաններն ու պարզաբանումները:
ՀՀ արդարադատության նախարարության աշխատակազմի
Տեղեկատվության և հասարակայնության
հետ կապերի բաժնի պետ Գևորգ Մանուկյան
