Իրանում կասեցրել են Հենրիկ Իբսենի «Հեդա Գաբլեր» պիեսի բեմադրությունը

14 Հունվար, 2011 19:54

Դիտումներ՝ *

Իրանական լրատվամիջոցները հայտնում են, որ Թեհրանի գլխավոր դատախազ Աբաս Ջաֆարի Դոլաթաբադի հրամանով կասեցվել էր նորվեգացի գրող Հենրիկ Իբսենի «Հեդա Գաբլեր» պիեսի բեմադրությունը: Դոլաթաբադիի հայտարարության համաձայն` «Հեդա Գաբլեր» պիեսի բեմականացումը բարոյական լուրջ խնդիրներ ունի, և իրենք կասեցնելու են այն բոլոր բեմադրությունները, որոնք վտանգելու են հասարակության մշակութային անվտանգությունը:
Իրանի խորհրդարանի պատգամավոր Ֆաթեմե Ռահբարը այդ կապակցությամբ հայտարարել է. «Ավելի լավ կլիներ, որ կազմակերպիչները այդ պիեսը բեմադրելու համար, դրա որոշ բաժինները վերանայելով, գոնե խնդրահարույց դրվագները հանեին բեմադրությունից»: Նրա փոխանցմամբ, խորհրդարանի մշակութային հանձնաժողովը մշակույթի նախարարության արվեստի բաժնի պետից բացատրություն է պահանջելու բեմադրության համար:
Թեհրանի դատախազը հայտարարել է, որ հիշյալ բեմադրությունը կասեցվել է, ու դրա կազմակերպիչները դատախազություն են կանչվել:
Իբսենի պիեսում, Հեդա Գաբլերը ներկայացնում է մի կրքոտ կնոջ կերպարանք, որը չգիտի ինչ անել իր անսահման ներքին էներգիայի հետ: Նա ամուսնալուծության հետևանքներից վախենալով, փորձում է արտամուսնական կապի մեջ մտնել ընտանիքի ընկերոջ հետ՝ դառնալով նրա սիրուհին:
Իբսենի «Հեդա Գաբլեր» պիեսը առաջին անգամ բեմադրվել է 1890-ին՝ Նորվեգիայում: