Եվրոպայի խորհրդի խորհրդարանական ասամբլեան քննադատել է Բելառուսի իշխանություններին՝ Վլադիսլավ Կովալյովին և Դմիտրի Կոնովալովին մահապատժի ենթարկելու համար: Վերջիններս ահաբեկչություն էին իրականացրել Մինսկի մետրոյում։ Այս մասին նշվում է ԵԽ խորհրդարանական ասամբլեայի պաշտոնական հայտարարության մեջ:
«ԵԽ խորհրդարանական ասամբլեան նախագահ Ժան-Կլոդ Մինյոնի գլխավորությամբ, վրդովված է Բելառուսում տեղի ունեցած՝ Վ. Կովալյովի և Դ. Կոնովալովի մահապատժի պատճառով: Բելառուսի իշխանությունները ևս մեկ անգամ անտեսեցին միջազգային հանրության՝ դատապարտվածներին ներում շնորհելու կոչերը: Մենք դատապարտում ենք Վ. Կովալյովի և Դ. Կոնովալովի մահապատիժը: Մահապատիժը դաժան և անիմաստ պրակտիկա է, օրինականացված բարբարոսություն, որին քաղաքակիրթ հասարակության մեջ տեղ չկա»,- նշվում է հայտարարության մեջ:
Հայտարարության մեջ ցավակցություն է հայտնվում մահապատժի ենթարկվածների ընտանիքներին և մտերիմներին:
Տվյալ պահին Բելառուսը եվրոպական միակ երկիրն է, որտեղ կիրառվում է առավելագույն պատժաչափը:
Երեկ Մինսկի մետրոյի ահաբեկչության ղեկավար Դ. Կոնովալովին և մասնակից Վ. Կովալյովին գնդակահարել են:
Մարտի 14-ին բելառուսական հեռուստատեսությունը հաղորդել էր, որ հանրապետության նախագահ Ալեքսանդր Լուկաշենկոն որոշում է ընդունել մերժել 2011 թվականի ապրիլի 11-ին Մինսկի մետրոյում ահաբեկչություն իրականացրած հանցագործների հանդեպ ներում շնորհելու կոչերը:
Ահաբեկչության արդյունքում զոհվել էր 15 մարդ, վիրավորվել՝ ավելի քան 200 մարդ:
