«Ժառանգություն» կուսակցության այսօրվա քաղխրհրդի նիստն առանց ցնցումների չի անցել: Նիստում պետք է հաստատվեր ոչ միայն «Ազատ դեմոկրատներ»-ի հետ ընտրություններին դաշինքով մասնակցության ձևաչափը, այլև քննարկվեր «Ժառանգության» ցուցակի հարցը:
Մինչև նիստի սկսվելը պատգամավոր Լարիսա Ալավերդյանը և «Ժառանգություն» կուսակցության փոխնախագահ Կարինե Հակոբյանը ելույթ են ունեցել, համագործակցության համար շնորհակալություն են հայտնել կուսակցությանն ու Րաֆֆի Հովհաննիսյանին և հայտարաել, որ իրենք դուրս են գալիս նախընտրական պայքարից և լքում են ընտրական գործընթացը: Այս մասին տեղեկացնում է hayeli.am-ը։
Ըստ կայքի՝ հիմնավորելով իրենց այդ քայլը` թե՛ Հակոբյանը, թե՛ Ալավերդյանը նշել են, որ իրենց համար ընդունելի և ընկալելի չեն քաղաքական այն գործընթացները, որում վերջին շրջանում ներքաշվել է «Ժառանգությունը»:
Ինչպես նշում է աղբյուրը, սա թերևս հասունացած խնդիր էր, քանի որ Ժառանգությունում» վերջին շրջանում ներկուսակցական թևեր էին ձևավորվել, և այս երկու գործիչների նման քայլը այդ երկու հոսանքների բախման արդյունք է:
