«Արմավիա» ավիաընկերությունն այսօր կրկին հայտարարություն է տարածել մարտի 15-ին «Արմենիա միջազգային օդանավակայաններ» ընկերության հետ կնքած համաձայնագրի խախտման մասին: «Արմավիայից» «Առաջին լրատվական»-ին հայտնեցին, որ ավիաընկերությունը կատարել է պայմանավորված գումարի առաջին չափաբաժնի 50%-ի վճարումը, սակայն «Զվարթնոց» օդանավակայանի սպասարկման գները չեն իջեցվել:
«Ազգային ավիափոխադրողը պայմանագրով ստանձնած իր պարտավորությունները կատարում է: «Արմենիան» չի իջեցրել Զվարթնոցի սպասարկման գները և չի կատարել պայմանագրով իր ստանձնած պարտավորությունները»,- նշեցին ավիաընկերությունից:
Սրան ի պատասխան՝ «Արմենիա միջազգային օդանավակայաններ» ընկերության մամլո խոսնակ Գևորգ Աբրահամյանը մեզ հետ զրույցում հայտարարեց, որ իրենց կողմից «բոլոր պարտավորությունները կատարվել են»:
Արդյոք «Արմավիան» ի վիճակի՞ է մարել կուտակված 5.3 մլն եվրո պարտքը, եթե չի կարողացել ընթացիկ ձևով դա վճարել: Այս հարցին ավիաընկերությունից պատասխանեցին, որ եթե օդանավակայանի սակագները իջնեն, այո: «Կուտակվել է, որովհետև միջազգային ավիացիան կատակլիզմի մեջ է, բոլորը գների նվազեցում են պահանջում, իսկ մեզ մոտ օդանավակայանի գները ամենաթանկն են: Դրա համար էլ շատ ես պարտք կուտակում, երբ ծառայությունների դիմաց շատ ես վճարում»,- նշեցին ընկերությունում՝ հավելելով, որ ներկայում ավիավառելիք ներկրող «Միկա հոլդինգից» ձեռք բերած գնի վրա օդանավակայանն ավելացնում է 146 դոլար/տոննա գումար, որպես ազգային ավիափոխադրող դրանից հանում է 30 դոլար, և ստացվում է, որ 116 դոլար/տոննա ավելի գնով վաճառում է ավիաընկերությանը:
Հարցին, թե ինչպես կազդեն այս ֆինանսական փոփոխությունները օդանավերի տոմսերի գնի վրա, ավիաընկերությունից նշեցին, որ եթե սակագները իջեցվեն, ընկերությունը նախ պետք է մարի պարտքը, ապա եթե ավիավառելիքի շուկայում գների կտրուկ փոփոխություններ չլինեն, պետք է գնա տոմսերի գների էժանացման, ոչ թե թանկացման:
