Տ. Կարապետյանի կենտրոնամետ հեքիաթները դարձել են արմատական

Տիգրան Կարապետյանը, զրկվելով եթերից, այսօր հայտարարում է, որ իշխանությունները իրեն կենտրոնամետ ընդդիմությունից մղեցին արմատական ընդդիմության դաշտ, և ինքն այժմ «ոչ» է ասում իշխանություններին: PArt ընկերության տնօրեն Կարեն Քոչարյանի համար անհասկանալի է կենտրոնամետ ընդդիմության գաղափարը. «Ինձ համար աբսուրդ է, չկա կենտրոնամետ ընդդիմություն, դա ի սկզբանե հեքիաթ էր, և հիմա էլ այդ հեքիաթի շարունակությունն է: Նա, ով հեքիաթներ շատ է սիրում ու հավատում այս տարիքում… Ես ինքս հեքիաթներին հավատալու տարիքից վաղուց արդեն դուրս եմ եկել ու չեմ հավատում»:
Կարապետյանի սկսած հանրահավաքների շարքի մասին խոսելով՝ Քոչարյանը նկատեց. «Դե, մարդը վաղուց երազել է մտնել Ազգային ժողով, հիմա ինչ-որ առիթ է, հանրահավաքներ է անում, ինչ-որ քանակի ժողովուրդ է հավաքում, ամեն դեպքում, նա ունի էլեկտորատ, և ինքը փորձում է օգտագործել այդ էլեկտորատը»:
Կարեն Քոչարյանը նշեց, որ չի կարող ասել, թե ինչքան էլեկտորատ ունի Տիգրան Կարապետյանը, քանզի, բացի այն, որ ինքը դրա մասնագետը չէ, նաև Հայաստանում երբեք էլեկտորատի ճիշտ թիվը ոչ ոք չի կարող իմանալ:
Իսկ թե արդյոք կբավականացնի՞ Տ. Կարապետյանի էլեկտորատը 2012 թ. ԱԺ-ում տեղեր ունենալու համար, Քոչարյանը պատասխանեց. «Նայած ոնց կուզի իշխանությունը»:
Անդրադառնալով այն տեսակետներին, թե Տ. Կարապետյանի արմատական ընդդիմություն դառնալը իշխանական պրոյեկտ է, Կարեն Քոչարյանն ասաց. «Քաղաքական պրոցեսներ են, իհարկե, քաղաքական պրոցեսներում ամեն ինչ էլ հնարավոր է»:
ՀԱԿ-ի ձայները կիսելու Տիգրան Կարապետյանի հնարավորությունները գնահատելով՝ Քոչարյանն ասաց. «Չեմ կարծում, որ նա ՀԱԿ-ի ձայները կտանի, որովհետև նրա էլեկտորատը այսօրվա ՀԱԿ-ի էլեկտորատը չէ»:
Ըստ Քոչարյանի, 2008 թ. ՀԱԿ-ի ընտրազանգվածը ամբողջ բողոքող զանգվածն էր, իսկ այսօր դա այդպես չէ. «Եթե Կարապետյանը պետք է տաներ, ապա արդեն տարել է, հիմա չի տանելու, որովհետև Կարապետյանի ընտրազանգվածը լյումպենն է»: