Հ. Բագրատյան. Սուպերմարկետներն են եղել թանկացման հիմնական պատճառներից մեկը

«Գնաճի նոր գործոն է առաջ եկել. բացի այն, որ մենաշնորհ են բոլոր տեսակի ներմուծումները, հիմա արդեն առևտուրն էլ է մենաշնորհ: Մեր գնահատմամբ, անցյալ տարվա մանրածախ ապրանքաշրջանառության 65%-ը իրականացվել է 4 սուպերմարկետների` «Երևան Սիթիի», «Սթարի», «Սասի» ու «Ֆրեշի» միջոցով, որոնք գների բարձրացման հիմնական պատճառն են հանդիսանում»,- այսօր լրագրողների հետ հանդիպման ժամանակ ասաց ՀՀ նախկին վարչապետ Հրանտ Բագրատյանը: «Այո, բացման առաջին ամսում սուպերմարկետները ի վիճակի են մասշտաբի էֆեկտի հաշվին միշտ ավելի ցածր գին առաջարկել, բայց հետագայում արդեն թանկացնում են: Եվ սուպերմարկետներին բնորոշ է այն, որ գները երբեք չեն իջեցնում: Միայն ակցիա են անում, բայց դա ակցիա է»,- նշեց նա` հավելելով, որ մինչև սուպերմարկետների հայտնվելը Հայաստանում մոտ 15 հազար մանր խանութպան կար, որոնք որոշ ժամանակաշրջաններում որոշ ապրանքների գները իջեցնում էին, ինչը երբեք չեն անի սուպերմարկետները: «Օրինակ՝ սուրճը հիմա մի 2 անգամ թանկացել է: Բայց սուրճին բնորոշ է, որ հետո մի 2 անգամ էլ էժանանա: Ու երբ որ էժանանա, մեզ մոտ գները չեն իջնի: Կիջնեին, եթե մանր խանութները շատ լինեին»,- ասաց նախկին վարչապետը: