Բրիտանական Financial Times թերթին տված հարցազրույցի ժամանակ British Petroleum (BP) ընկերության՝ «Շահ Դենիզ» գազային հանքավայրի մշակման գծով փոխնախագահ Ալիստեր Կուկն անդրադարձել է Nabucco գազատարի նախագծի իրագործման խնդրին.
«Nabucco գազատարի նախագծի կոնցեպցիայի փոփոխումը մեծ քայլ է դեպի առաջ: Մենք կարծում ենք, որ Nabucco-West-ը զգալիորեն բարելավել է իրավիճակը: Մենք շատ ուրախ ենք դրա համար: Համոզված ենք, որ ավելի խելամիտ է փոքր խողովակաշար կառուցելը, որը, սակայն, կարող է ընդլայնվել, երբ հասանելի կդառնան գազի մեծ պաշարները»:
Նշվում է, որ Nabucco Gas Pipeline International-ն առաջարկել է նախագծի նոր կոնցեպցիա՝ Nabucco-West: Ըստ դրա՝ այդ խողովակաշարը մեկնարկելու է թուրք-բուլղարական սահմանից մինչև ավստրիական Բաումգարտեն: Որոշակի տվյալներով՝ դա կարող է հանգեցնել նրան, որ Nabucco գազատարի սկզբնական հզորությունը (տարեկան 31 միլիարդ խորանարդ մետր) կարող է կրկնակի կրճատվել:
Հիշեցնենք, որ ներկայումս Թուրքիան և Ադրբեջանը պլանավորել են կյանքի կոչել TANAP (Անդրանատոլիական գազատար) նախագիծը, որը Թուրքիայի արևելյան սահմանից ձգվելու է մինչև արևմտյան սահման: Դրանով ադրբեջանական և կասպյան գազը կարող է հասնել Թուրքիայի եվրոպական հատված: