ԱՄՆ Կենտրոնական հետախուզական վարչությունը (ԿՀՎ) հոգեբանորեն ոչնչացնում է իր աշխատակիցների ընտանիքները, պարզել են լրագրողները:
ԿՀՎ-ում աշխատանքը խանգարում է ամուսնական լիարժեք կյանքին: Այսօրվա իր համարում գրել է The Washington Post-ը, որի աշխատակիցները հետաքննություն են անցկացրել այս թեմայի հետ կապված ու եկել են եզրակացության, որ գաղտնիությունը, անորոշությունը ու վաղվա օրվա նկատմամբ անվստահությունը լուրջ խոչընդոտ է երջանիկ ամուսնության ճանապարհին:
ԿՀՎ-ի աշխատակիցներից մեկի՝ ամուսնուց հեռացած կինը լրագրողներին պատմել է, որ իրեն երբեք անվտանգ չի զգացել, երբեք չի իմացել, թե ով ու ինչի համար է իրենով հետաքրքրվել կամ ինչու է լուսանկարել:
ԿՀՎ-ի շատ աշխատակիցներ իրենք էլ են համաձայնում, որ ամուսնալուծության տոկոսը իրենց աշխատակիցների շարքերում չափազանց բարձր է:
Թերթը, սակայն, նկատում է, որ հաշվի առնելով տվյալ աշխատանքի առանձնահատկությունը՝ անհնար է բավարար քանակությամբ տեղեկություն հավաքել, թե քանի տոկոս է կազմում ամուսնալուծությունը ԿՀՎ աշխատակիցների շրջանում:
ԿՀՎ ղեկավարությունը, այդուհանդերձ, հնարավոր ամեն ինչ անում է` իր աշխատակիցների ընտանեկան խնդիրները հարթելու ու նրանց աջակցելու համար:
