Եվրախորհրդարանն այսօր բանաձև է ընդունել Ռուսաստանում տեղի ունեցած նախագահական ընտրությունների վերաբերյալ: Ինչպես ենթադրվում էր, այն շատ ավելի մեղմ է, քան անցյալ տարվա դեկտեմբերին Պետդումայի ընտրությունների վերաբերյալ բանաձևը:
Ինչպես հաղորդում է Эхо Москвы ռադիոկայանը, Եվրախորհրդարանի այս բանաձևը չափավոր քննադատական է. պատգամավորները նշել են, որ ընտրությունների նախապատրաստման և քվեարկության ընթացքում թույլատրվել են զգալի բացթողումներ և թերություններ:
«Ժողովրդական ազատություն կուսակցության» համանախագահ Միխայիլ Կասյանովը հայտնել է, որ Եվրախորհրդարանը գնահատել է Ռուսաստանում տեղի ունեցած նախագահական ընտրութունները որպես «անազատ և անարդար»: Մասնավորապես, բանաձևի հեղինակները կարծում են, որ ռուս ընտրողներին սահմանափակ ընտրելու իրավունք է տրվել, քանի որ Կենտրոնական ընտրական հանձնաժողովը հրաժարվել է գրանցել Яблоко կուսակցության ղեկավար Գրիգորի Յավլինսկու թեկնածությունը:
Խորհրդարանականները հիշեցրել են, որ Ռուսաստանը Եվրախորհրդի և ԵԱՀԿ լիիրավ անդամ է և իր վրա համապատախան պարտավորություններ է վերցրել՝ հարգելու ժողովրդավարության սկզբունքները և մարդու իրավունքները: «Այդ կապակցությամբ՝ ընտրությունների նախապատրաստման և անցկացման ընթացքում բոլոր թերությունները և խախտումները պետք է վերլուծվեն»,- կարծում են Ստրասբուրգում:
Բացի այդ, խորհրդարանականները կոչ են արել նայել ոչ թե անցյալին, այլ ապագային, պաշտպանել հասարակության՝ բարեփոխումների տրամադրված շերտերին՝ հույս հայտնելով, որ Ռուսաստանում կակտիվանա ժողովրդավարացման գործընթացը:
Նրանք նաև հույս են հայտնել, որ «Ռուսասատանի ընտրյալ նախագահը պատրաստ կլինի առաջ տանել քաղաքական համակարգի բարեփոխումները՝ ներառյալ կուսակցությունների գրանցման կանոնների թեթևացումը, ԶԼՄ-ների անկախացումը, հավաքների և ինքնաարտահայտման ազատությունը»:
