Բարբարա Սթրեյզընդը կդառնա «Ջիպսի» մյուզիքլի հիման վրա նկարահանվող ֆիլմի պրոդյուսերը:
Երկրորդ պրոդյուսերը լինելու է Ջոել Սիլվերը, ով ավելի վաղ եղել է«Շերլոք Հոլմս. ստվերների խաղը», «Մատրիցա», «Պինդ ընկույզ» ֆիլմերի պրոդյուսերը:
Մյուզիքլի նոր էկրանավորման սցենարը կգրի Ջուլիան Ֆելլոուզը, ով հայտնի է «Դաունտոնի աբբայություն» սերիալի շնորհիվ:
«Ջիպսին» գրվել է նախկին մերկապարուհի Ջիպսի Ռոուզ Լիի հուշերի հիման վրա՝ 1959 թ., և չորս անգամ վերածնվել է Բրոդվեյում: Մյուզիքլի հիման վրա 1962 թ. արդեն նկարահանվել է համանուն ֆիլմ, որը ներկայացվել է «Օսկար»–ի։
Սա Սթրեյզընդի պրոդյուսերական առաջին աշխատանքը չէ, նախորդ ֆիլմը, որտեղ նա և՛ պրոդյուսեր էր, և՛ գլխավոր դերակատար, նկարահանվել է 1983 թ. և կոչվել է «Եթլի»:
Նշենք, որ Սթրեյզընդը երկու «Օսկար»–ների դափնեկիր է: Բացի այդ, նա ամբողջ աշխարհում 145 մլն օրինակով վաճառել է իր ձայնասկավառակները և համարվում է աշխարհի ամենակոմերցիոն կանանցից մեկը:
