Ինտերնետ-հսկաները պետք է օնլայն գովազդից ֆրանսիական բյուջեին հարկ վճարեն: Այս մասին, ինչպես հաղորդում է Agence France-Presse-ը, Ֆրանսիայի նախագահ Նիկոլա Սարկոզին հայտարարել է Le Point հրատարակությանը տված հարցազրույցում:
Պետության ղեկավարի խոսքերով՝ վերընտրման դեպքում ինքը կհասնի ինտերնետ-ընկերությունների հարկմանը ոչ միայն Ֆրանսիայում, այլ նաև՝ ամբողջ Եվրամիությունում: «Անթույլատրելի է, որ ընկերությունները, որոնք Ֆրանսիայում ստանում են միլիարդավոր եվրո շահույթ, այդ եկամտից հարկ չեն վճարում»,- նշել է նախագահը:
Ավելի վաղ Սարկոզին արդեն իսկ տվել էր հանձնարարական՝ ուսումնասիրելու «Google–ին հարկելու» հնարավորությունը: Այս առաջարկը հաջորդել էր մեդիա ընկերությունների բազմաթիվ բողոքներին, ըստ որոնց՝ խոշոր ինտերնետ-պորտալները գովազդային հարթակների վաճառքով գումար են աշխատում մասնավորապես լուրերի շնորհիվ: Ֆրանսիայի մշակույթի նախարարությունը հանդես էր եկել օնլայն-գովազդի նոր հարկի մասին օրինագծի նախաձեռնությամբ՝ առաջարկելով ստացված միջոցներն ուղղել տեղական գրողների, երաժիշտների և հրատարակիչների գործունեությանը նպաստելուն։
Google-ը քննադատել էր այդ նախաձեռնությունը, նշելով, որ ինտերնետ-ընկերությունները ստեղծում են հազարավոր աշխատավայրեր, իսկ նմանօրինակ որոշումը միայն կդանդաղեցնի նորարարությունները: 2011 թվականի հունիսին ֆրանսիական խորհրդարանը մերժել էր նախագիծը:
