ՄԱԿ-ի և Արաբական պետությունների լիգայի հատուկ ներկայացուցիչ Քոֆի Անանն ուրբաթ օրը ՄԱԿ-ի Անվտանգության խորհրդին կներկայացնի Սիրիայում ճգնաժամի դադարեցման իր առաքելության արդյունքները։ Այս մասին հաղորդում է BBC-ն:
ՄԱԿ-ի նախկին գլխավոր քարտուղարի առջև խնդիր էր դրված փորձել պայմանավորվել Սիրիայում կրակի դադարեցման և իշխանության ու ընդդիմության միջև քաղաքական երկխոսություն սկսելու վերաբերյալ:
Քոֆի Անանի մամլո քարտուղարը հայտարարել է, որ Սիրիայի նախագահը պատասխանել է կոնկրետ առաջարկությունների, սակայն բանագնացը դեռ որոշ հարցեր ունի:
ՄԱԿ-ի արևմտյան դիվանագետներից մեկը հայտարարել է, որ մեծ հույսեր է կապում Քոֆի Անանի առաքելության հետ, քանի որ այն համարվում է հակամարտության խաղաղ կարգավորման վերջին հնարավորությունը:
Նրա խոսքերով՝ Անանի առաքելության արդյունքներից ելնելով՝ ԱԽ–ն կորոշի՝ շարունակե՞լ արդյոք Սիրիայի հետ բանակցությունները, թե՞ այլ ուղղությամբ շարժվել:
Բանաձևի տվյալ նախագծում փորձաքարն այն հարցն է, թե ով իր վրա կվերցնի բռնությունների պատասխանատվությունը, և ով այն առաջինը կդադարեցնի:
Ռուսաստանն ուզում է, որպեսզի և՛ բանակը, և՛ ապստամբները միառժամանակ դադարեցնեն բռնությունները՝ այն դեպքում երբ արևմտյան երկրները վստահեցնում են, որ Սիրիայում իշխող վարչակարգն ավելի մեծ պատասխանատվություն է կրում և պետք է առաջինը սկսի նահանջել:
