Հայաստանի փոխվարչապետ, տարածքային կառավարման նախարար Արմեն Գևորգյանն այսօր` մարտի 14-ին, ընդունել է Ռուսաստանի Դաշնության տարածքային զարգացման փոխնախարար Մաքսիմ Տրավնիկովին:
ՏԿՆ հասարակայնության հետ կապերի բաժնից «Առաջին լրատվական»-ին տեղեկացրել են, որ զրուցակիցներն ամփոփել են Հայաստանի Հանրապետության և Ռուսաստանի Դաշնության միջև տնտեսական համագործակցության միջկառավարական հանձնաժողովի` միջտարածաշրջանային համագործակցության հարցերով հայ-ռուսական աշխատանքային խմբի առաջին նիստի արդյունքները:
Ձեռք են բերվել մի շարք պայմանավորվածություններ: Մասնավորապես` Հայաստանի քաղաքաշինության և Ռուսաստանի տարածքային զարգացման նախարարություններն ավարտին պետք է հասցնեն քաղաքաշինական ոլորտում համագործակցության համաձայնագրի նախագծի համապատասխանեցումը:
Ռուսական կողմը փոխանցել է Հայաստանի կառավարության հետ առևտրատնտեսական, գիտական և մշակութային համագործակցության համաձայնագիր կնքելու վերաբերյալ Արխանգելսկի մարզի պատրաստակամությունը, հայկական կողմն էլ տեղեկացրել է, որ ներկայացվել է Ռոստովի մարզի հետ նմանատիպ համագործակցության համաձայնագրի նախագիծ: Պայմանավորվածություն է ձեռք բերվել, որ աշխատանքային խմբի շրջանակում կկազմակերպվի տարածքային զարգացման ծրագրերի իրականացման և մշակման վերաբերյալ երկու երկրների տարածաշրջանների փորձի փոխանակում: Երկու երկրների շահագրգիռ մարմիններին առաջարկվել է աջակցել Երևանի և Մոսկվայի քաղաքային իշխանություններին` ընթացիկ տարվա ապրիլին Երևանում Մոսկվայի օրեր կազմակերպելու հարցում:
Զրուցակիցները նաև անդրադարձել են հայ-ռուսական միջտարածաշրջանային երկրորդ համաժողովի անցկացման կազմակերպչական հարցերին, որի ընթացքում քննարկվելու են գործնական կապերի զարգացման, համատեղ ծրագրերի իրականացման հարցեր:
