Ռուսաստանի Անվտանգության դաշնային ծառայությունը հրաժարվել է նշել Պետդումայի այն պատգամավորների անունները, ովքեր օրինաստեղծման հարցերով խորհրդատվություն են ստացել բրիտանական հետախուզության աշխատակից Մարկ Դոուից,- գրում է «Մոսկովսկիյ կոմսոմոլեց» թերթը:
Համապատասխան խնդրանք խորհրդարանականներն ուղարկել էին 2012 թ. հունվարի վերջին այն բանից հետո, երբ Անվտանգության ծառայության գեներալ Սերգեյ Սորոկինը հեռուստաեթերում հայտարարեց, թե որոշ պատգամավորներ կապեր ունեն հետախույզի հետ:
«Եդինայա Ռոսիա» կուսակցության պատգամավոր Ալեքսանդր Խինշտեյնը պարբերականին պատմել է, որ պատասխանում պատգամավորների կոնկրետ անուններ չեն նշվում, քանի որ, ըստ փաստաթղթի, այդ տեղեկատվությունը «գաղտնի աղբյուրներից է»:
Ընդ որում, անվտանգության ծառայությունում նշել են, որ ըստ Սմիրնովի՝ կապերը եղել են 2005-2006 թթ.: Այդպիսով, խոսքը Պետդումայի 4-րդ գումարման պատգամավորների մասին է, որոնք հնարավոր է՝ չեն վերընտրվել հաջորդ գումարման ժամանակ:
Արկադի Մամոնտովի ֆիլմում «Լրտեսական քար» էր անվանվել բրիտանական հետախուզության և Ռուսաստանի աղբյուրների միջև տեղեկատվության փոխանակման սարքը: Առաջին անգամ ֆիլմը ցուցադրվել է 2006 թ.: Երկար ժամանակ «լրտեսական քարի» գոյության մասին որևէ ապացույց չկար: Սակայն 2012 թ. հունվարին Մեծ Բրիտանիայի նախկին վարչապետ Թոնի Բլեերի խորհրդական Ջոնաթան Պաուելը խոստովանեց, որ այդպիսի սարք իրոք օգտագործվել է:
