Մեքսիկայի Միչոական նահանգի և երկրի մյուս շրջանների միջև ավտոբուսային երթևեկությունը դադարեցվել է, քանի որ այդ նահանգի տարածքում ավելացել են անչափահաս հրոսակախմբերի կողմից ավտոբուսների վրա հարձակումները: Այս մասին հաղորդում են մեքսիկական լրատվամիջոցները:
Նահանգի ավտոբուսային գծատերերը նման որոշում են կայացրել` ուղևորների և վարորդների կյանքը չվտանգելու համար: Նշվում է, որ միայն վերջին 5 օրերի ընթացքում հարձակման են ենթարկվել մոտ 30 ավտոբուսներ: Ոստիկանությանն ու նահանգային իշխանություններին դեռևս չի հաջողվում իրավիճակը վերցնել վերահսկողության տակ:
Միչոականում ավտոբուսային կապի դադարեցման պատճառով ընդհատվել է հաղորդակցությունը մայրաքաղաք Մեխիկոյի, Գվադալահարայի, Տոլուկայի, Կերետարոյի և այլ քաղաքների միջև:
Մեքսիկայում միջքաղաքային ուղևորափոխադրումները հիմնականում կատարվում են ավտոբուսներով, և այս որոշումը կարող է լուրջ խնդիրներ առաջացնել երկրում: