«Սերժ Սարգսյանի ավտոշարասյունը մեկ կադրի մեջ ընդգրկելու մեր ֆոտոթղթակիցների փորձերն անընդհատ ձախողվում են մի պարզ պատճառով. այդ շարասյունը այնքան մեծ է, որ հնարավոր չէ ընդգրկել մեկ կադրի մեջ: Ընդ որում, խոսքն ամենօրյա, սովորական ավտոշարասյան մասին է, որով Սերժ Սարգսյանը շրջում է քաղաքում` տնից աշխատանքի, աշխատանքից տուն գնալիս, Երևանում տեղաշարժվելիս»,- գրում է «ՀԺ»-ն և հավելում.
«Սա մի տպավորիչ, սուպերբայեվիկներին արժանի տեսարան է. նախ` շարասյան մոտենալուց րոպեներ առաջ մոտակա խաչմերուկները հարայհրոցով փակվում են, ընդ որում` հարայհրոցը, բարձրախոսով աղաղակող ոստիկանների ձայներն այնքան բարձր են լինում, որ լսվում են անգամ տվյալ վայրից երեք-չորս շենք այնկողմ: Քիչ անց, ահա, դատարկ փողոցում հայտնվում է ճանապարհային ոստիկանության «Պրադո» ջիփը` միգալկաներով, ձայնային ազդանշաններով: Սրան հաջորդում է հատուկ սարքավորված «Տոյոտա» մակնիշի ջիփը, որը բեռնախցիկ ունի տանիքին:
Սրանից հետո արդեն գալիս է Սերժ Սարգսյանի զրահապատ «Մերսեդեսը», երեք կողմից շրջափակված «Տոյոտա» մակնիշի երեք մեծածավալ ջիփերով: Սրանց հետևից գալիս է «Մերսեդես» մակնիշի միկրոավտոբուսը` մգացված ապակիներով:
Ենթադրվում է, որ սրա մեջ սարքավորված են անհետաձգելի բուժօգնության սարքավորումներ: Սրան հաջորդում են երկու միջին չափի ջիփեր, այս ջիփերին հաջորդում է սեդանը, սրան էլ հաջորդում է ճանապարհային ոստիկանության սեդան «Տոյոտան»:
Այսինքն, Սերժ Սարգսյանը շրջում է տասը ուղեկցող ավտոմեքենաներով, և սա, նշում ենք, տեսանելի թիկնազորն է: Մեքենաների թիվը ենթադրում է, որ նրա հետ մշտապես կարող են շրջել լավ զինված 35-50 հոգի: Թե ինչ է նշանակում այս փաստը, չենք ուզում մեկնաբանել: Մեկնաբանությունները, կարծում ենք, ավելորդ են: Մի բան, սակայն, վստահաբար կարող ենք պնդել, մոտավորապես նման թիկնազորով շրջում են ԱՄՆ-ի, Ռուսաստանի նախագահները:
Նման շարասյուն-թիկնազորով հաստատ չեն շրջում, օրինակ, Մեծ Բրիտանիայի վարչապետը, Ֆրանսիայի նախագահը, Գերմանիայի Ֆեդերալ կանցլերը, Լեհաստանի նախագահը: Ի դեպ, փորձագիտական գնահատականների համաձայն` Սերժ Սարգսյանի ավտոշարասյան մեջ ներգրավված ավտոմեքենաների համախառն գինը 850-900 հազար ԱՄՆ դոլար է»:
