«Իրանական խնդրի դիվանագիտական լուծման համար կա և՛ ժամանակ, և՛ հնարավորություն»,– հաստատել են ԱՄՆ նախագահ Բարաք Օբաման և Մեծ Բրիտանիայի վարչապետ Դևիդ Քեմերոնը՝ Washington Post թերթում հրապարակված համատեղ հոդվածում:
«Որպես միջազգային հանրության անդամներ, մենք միասնական ճակատով ընդունում ենք պատժամիջոցների կիրառումն Իրանի դեմ, որը խախտում է իր միջազգային պարտավորությունները: Մենք համարում ենք, որ հարցի լուծման համար կա և՛ ժամանակ, և՛ հնարավորություն։ Այնպես, որ մենք համակարգում ենք մեր դիվանագիտական մոտեցումները Չինաստանի, Ֆրանսիայի, Գերմանիայի և Ռուսաստանի հետ», -նշել են Օբաման և Քեմերոնը:
Միաժամանակ նրանք զգուշացրել են, որ գնալով Իրանի ընտրության տարբերակները նվազում են:
«Հիմա, երբ ԱՄՆ–ը սկսել է կիրառել խիստ պատժամիջոցներ, իսկ Եվրամիությունը պատրաստվում է էմբարգո կիրառել իրանական նավթի վրա, Իրանի համար մեծ ընտրություն չի մնում. կա՛մ նա սկսում է իրականացնել իր միջազգային պարտավորությունները, կա՛մ էլ սկսում է վճարել իր պահվածքի համար»,- հայտարարել են երկրների ղեկավարները:
