Իշխանություններն ընդունեցին Մոզրովի փլուզման փաստը. «Չենք լռելու» (տեսանյութ)

Այսօր առավոտյան «Չենք լռելու» երիտասարդական նախաձեռնությունը հաղորդագրություն և տեսանյութ տարածեց Հայաստանի բնության ամենչքնաղ հուշարձաններից մեկի` հանրահայտ Մոզրովի քարանձավի փլուզման մասին` մեղադրելով պատկան մարմիններին քարանձավի պահպանման հարցում անգործություն ցուցաբերելու մեջ: Նշենք, որ փլուզումը տեղի է ունեցել դեռ օրեր առաջ, և այդ տեղեկատնությունը նախաձեռնությանն են հայտնել Վայքում բնակվող մի խումբ երիտասարդներ:

Զավեշտալի է, որ այսօր առավոտյան հայտարարության տարածումից քիչ անց «Մեդիամաքս» գործակալության հետ զրույցում ՀՀ մշակույթի նախարարության Պատմամշակութային հուշարձանների պահպանման գործակալության պետի տեղակալ Սամվել Մուսոյանը հերքել է «Չենք լռելու»-ի տեղեկատվությունը` ասելով բառացիորեն հետևյալը. «Մենք կապվել ենք տարածքային բաժնի հետ եւ պարզել ենք, որ նոր փլուզում տեղի չի ունեցել, իսկ շարունակական քարաթափումը բնական բնույթ է կրում»:

Այս ցինիզմին ի պատասխան խնդրին ծանոթ մի շարք ակտիվիստներ մեկնաբանություններ տվեցին լրատվամիջոցներին, ինչից հետո միայն, ժամը 13:21-ին ՀՀ արտակարգ իրավիճակների նախարարությունը հաղորդագրություն տարածեց հետևյալ բովանդակությամբ.

«Մարտի 13-ին, ժամը 12.35֊-ին Վայոց Ձորի Գնիշիկի գյուղապետից տեղեկատվություն է ստացվել, որ «Մոզրովի» քարանձավում տեղի է ունեցել փլուզում: Քարանձավում, առաջին մուտքից 20 մ հեռավորության վրա, փլուզվել է մոտ 50-70 խմ հողազանգված, մասնակի փակելով երկրորդ մուտքը /տես`http://ema.am/index.php?p=1&pobj_id=10588484&ppage=1&pdate=&pregion= / »:

Փաստորեն, իշխանություններն «իմացան» Մոզրովի` դեռևս օրեր առաջ տեղի ունեցած փլուզման մասին միայն «Չենք լռելու» երիտասարդական նախաձեռնության բարձրացրած աղմուկից հետո: Սա մեր երկրում տիրող համատարած մառազմի հերթական դրսևորումներից է:

Ինչպես արդեն նշել ենք, նախկինում անձավագետները բազմիցս ահազանգել են Մոզրովի քարանձավի պահպանման հարցում պետության կողմից անհրաժեշտ ուշադրության բացակայության մասին, սակայն այդ ամենը մնաց ձայն բարբառոյ անապատի: Մոզրովի փլուզումը ևս մեկ անգամ գալիս է ապացուցելու, որ, ինչպես Կաթողիկոսը որևէ գործ չունի, իր իսկ խոսքերով «էդ սարերում գտնվող վանքերի հետ», այդպես էլ պետությունը որևէ գործ չունի մեր բնության պահպանման հետ…