ИТАР-ТАСС-ի փոխանցմամբ՝ Ճապոնիան այսօր պատժամիջոցներ է սահմանել իրանական հերթական խոշոր բանկի նկատմամբ՝ Իրանի վրա գործադրվող տնտեսական ճնշումն ավելացնելու համար: Այս մասին հայտարարել է Ճապոնիայի արտգործնախարար Կոիտիրո Գեմբան.
«Մենք որոշել ենք սառեցնել «Թեջարաթ» բանկի՝ Ճապոնիայում ունեցած ակտիվները, որը Իրանի երրորդ խոշոր բանկն է: Մենք գիտակցում ենք, որ նմանատիպ պատժամիջոցների սահմանումը կարող է որոշակիորեն ազդել մեր երկրի տնտեսության վրա, սակայն կարծում ենք, որ դա անհրաժեշտ է՝ Իրանի հարցում միջազգային համագործակցության համար»:
Հիշեցնենք, որ Ճապոնիան ավելի վաղ պատժամիջոցներ էր սահմանել տարբեր մեծության իրանական բանկերի նկատմամբ: Միևնույն ժամանակ Ճապոնիան չի համաձայնել իրանական նավթի ներկրումից ամբողջովին հրաժարվելուն՝ դա պատճառաբանելով իր տնտեսության համար լուրջ հետևանքներով: 2011 թվականին Ճապոնիան հանդիսացել է իրանական նավթի երրորդ խոշոր ներկրողը՝ Չինաստանից ու ԵՄ-ից հետո:
Ի դեպ, այս տարվա հունվարի 23-ին «Թեջարաթ» բանկի դեմ պատժամիջոցներ էր սահմանել ԱՄՆ ֆինանսների նախարարությունը: Բանկն Իրանում ունի մոտ 2000 մասնաճյուղ:
