ՀՀ ոստիկանության քննչական գլխավոր վարչությունում ավարտվել է թվով 6 նախկին օդաչու կենսաթոշակառուի կենսաթոշակի հաշվարկման և վճարման ընթացքում հայտնաբերված խախտումների մասով նախաքննությունը:
Հիշեցնենք, որ 2009-2010թթ. ընթացքում կենսաթոշակների նշանակման և վճարման գործընթացում արձանագրված չարաշահումների կապակցությամբ ՀՀ գլխավոր դատախազության պետական շահերի պաշտպանության վարչությունում 2011թ. մայիսին հարուցվել էր քրեական գործ՝ քրեական օրենսգրքի 179-րդ հոդվածի 3-րդ մասի 1-ին կետով (յուրացում), 308-րդ հոդվածի 2-րդ մասով (պաշտոնեական լիազորությունները չարաշահելը) և 314-րդ հոդվածի 1-ին մասով (պաշտոնեական կեղծիք կատարելը), որով նախաքննությունը հանձնարարվել է ոստիկանության քննչական գլխավոր վարչությանը:
Նախաքննության ընթացքում, ի թիվս այլ չարաշահումների, խախտումներ են հայտնաբերվել նաև նախկին օդաչուների կենսաթոշակների հաշվարկման և վճարման ընթացքում:
Քրեական գործի նախաքննությամբ մասնավորապես, պարզվել է, որ 2009թ. օգոստոսից մինչև 2010թ. փետրվարն ընկած ժամանակահատվածում ՀՀ ավիացիայի գլխավոր վարչության աշխատակից, այժմ հանգուցյալ Է. Միրզոյանի կազմակերպմամբ և նախկին բորտ-ուղեկցորդուհի Կ. Խալաթյանի միջնորդությամբ նախկին օդաչուներ Ա. Հակոբյանը, Մ. Եֆրեմյանը, Ա. Թունյանը, Տ. Սիմոնյանը, Ս. Հովհաննիսյանը և Ծ. Ասատրյանը Կ. Խալաթյանին տվել են ընդհանուր 16.800 ԱՄՆ դոլար՝ ՀՀ աշխատանքի և սոցիալական հարցերի նախարարության սոցիալական ապահովության պետական ծառայության «Դավիթաշեն» տարածքային բաժնի նախկին պետ Ս. Հակոբյանին և նույն բաժնի գլխավոր մասնագետ Գ. Վարդանյանին որպես կաշառք փոխանցելու համար:
Միջնորդության համար իր և Է. Միրզոյանի բաժնեմասը վերցնելուց հետո Կ. Խալաթյանը զգալի և խոշոր չափի, ընդհանուր 7.600 ԱՄՆ դոլար կաշառքի գումարը փոխանցել է Ս. Հակոբյանին և Գ. Վարդանյանին՝ կենսաթոշակառուներ Ա. Հակոբյանի, Մ. Եֆրեմյանի, Ա. Թունյանի, Տ. Սիմոնյանի, Ս. Հովհաննիսյանի և Ծ. Ասատրյանի օգտին ակնհայտ ապօրինի գործողություններ կատարելու՝ պաշտոնական փաստաթուղթ հանդիսացող կենսաթոշակի գործերում և հաշվարկ-կարգադրություններում ակնհայտ կեղծ տեղեկություններ մտցնելու, իրենց գործողություններով հիշյալ կենսաթոշակառուներին տարբեր ժամանակահատվածներում խաբեությամբ թռիչքային գրքույկներում թռիչքային ժամերի հավելագրումների եղանակով ավելի հաշվարկված ընդհանուր 7.855.650 դրամ խոշոր չափերի հասնող կենսաթոշակի գումարները ստանալուն և հափշտակելուն օժանդակելու դիմաց:
Նախաքննության ընթացքում օդաչու-կենսաթոշակառուների հափշտակած կենսաթոշակների գումարներն ամբողջությամբ վերականգնվել են:
Մինչդատական վարույթում ձեռք բերված ապացույցների հիման վրա Ս. Հակոբյանին մեղադրանք է առաջադրվել ՀՀ քրեական օրենսգրքի 311-րդ հոդվածի 2-րդ մասով, 3-րդ մասի 3-րդ կետով, 38-178-րդ հոդվածի 2-րդ մասի 2-րդ կետով, 314-րդ հոդվածով և 315-րդ հոդվածի 1-ին մասով, Գ. Վարդանյանին՝ ՀՀ քրեական օրենսգրքի 38-311-րդ հոդվածի 3-րդ մասի 3-րդ կետով, 2-րդ մասով, 38-178-րդ հոդվածի 2-րդ մասի 2-րդ կետով, 38-314-րդ հոդվածով և 38-325-րդ հոդվածի 2-րդ մասով, Կ. Խալաթյանին՝ ՀՀ քրեական օրենսգրքի 38-178-րդ հոդվածի 2-րդ մասի 2-րդ կետով, 313-րդ հոդվածի 1-ին մասով և 38-325-րդ հոդվածի 1-ին մասով:
Կենսաթոշակառուներ Մ. Եֆրեմյանին, Ա. Թունյանին, Ս. Հովհաննիսյանին, Տ. Սիմոնյանին և Ծ. Ասատրյանին մեղադրանք է առաջադրվել քրեական օրենսգրքի 178-րդ հոդվածի 2-րդ մասի 2-րդ կետով, իսկ մեկ այլ կենսաթոշակառու Ա. Աբրահամյանի մասով 2012թ. փետրվարի 21-ին քրեական օրենսգրքի 178-րդ հոդվածի 2-րդ մասի 2-րդ կետով որպես մեղադրյալ ներգրավելու, նրա նկատմաբ կալանավորումը որպես խափանման միջոց կիրառելու և հետախուզում հայտարարելու որոշում է կայացվել:
Դավիթաշեն վարչական շրջանի «ՍՈՍ» համատիրության նախագահ Ժ. Ղուկասյանին և նույն համատիրության հաշվապահ Ա. Գևորգյանին մեղադրանք է առաջադրվել ՀՀ քրեական օրենսգրքի 325-րդ հոդվածի 2-րդ մասով:
2012թ. մայիսի 6-ին քրեական գործից անջատվել է մաս՝ ըստ մեղադրանքի Ս. Հակոբյանի, Գ. Վարդանյանի, Կ. Խալաթյանի, Մ. Եֆրեմյանի, Ա. Թունյանի, Ս. Հովհաննիսյանի, Տ. Սիմոնյանի, Ծ. Ասատրյանի, Ա. Աբրահամյանի, Ժ. Ղուկասյանի և Ա. Գևորգյանի, և ուղարկվել Երևանի Աջափնյակ և Դավիթաշեն վարչական շրջանների ընդհանուր իրավասության դատարան՝ ըստ էության քննելու համար:
Կենսաթոշակների նշանակման և վճարման գործընթացում հայտնաբերված մյուս խախտումների վերաբերյալ նախաքննությունը շարունակվում է:
