Ֆրանսիացի դերասան Օլիվիե Մարտինեսը հաստատել է իր ու ամերիկացի դերասանուհի Հոլլի Բերրիի նշանադրության մասին լուրերը: Այս մասին հայտնում է Reuters գործակալությունը` հղում անելով Miami Herald-ին:
«Այո, իհարկե, դա ճիշտ է»,- լրագրողներին ասել է դերասանը Մայամիում, որտեղ գտնվում էր՝ մասնակցելու իր սեփական Villa Azur ռեստորանի բացմանը:
Զույգի նշանադրության մասին լուրերը շրջանառվեցին այն բանից հետո, երբ հունվարին Բերրին հանրությանը երևաց՝ մատնեմատին մեծ զմրուխտե մատանի:
Մարտինեսը պատմել է, որ մատանու դիզայնը պատկանում է փարիզցի ոսկերիչ Ռոբեր Մազլոյին: Նա նաև հիշեցրել է, որ Mazlo ոսկերչական տունը հարյուրամյակներ շարունակ զարդեր է պատրաստել թագավորական ընտանիքներների անդամների համար:
Բերրին ու Մարտինեսը հանդիպում են 2010 թվականից: Նրանք ծանոթացել են «Մութ մակընթացություն» ֆիլմի նկարահանումների ժամանակ, որը պետք է հայտնվի վարձույթում այս տարի:
Հայտնի չէ, թե երբ տեղի կունենա զույգի ամուսնական արարողությունը:
Օլիվիեն, որը հունվարին դարձավ 46 տարեկան, նախկինում երբևէ ամուսնացած չի եղել: Նա հայտնի է դերասանուհի Միրա Սորվինոյի և երգչուհի Քայլի Մինոուգի հետ սկանդալային սիրավեպերով:
45-ամյա Հոլլիի համար սա կլինի արդեն երրորդ ամուսնությունը: Ավելի վաղ նա ամուսնացել էր բեյսբոլիստ Դեյվիդ Ջասթինի և երգիչ Էրիկ Բենեթի հետ, որից բաժանվել է 2005 թ.: Ամուսնալուծությունից հետո նա սկսեց հանդիպել մոդել Գաբրիել Օբրիի հետ, որից 2008 թ. աղջիկ ունեցավ:
