Վրացական «Ասավալ-դասավալի» թերթին տված հարցազրույցի ժամանակ Վրաստանի նախկին նախագահ Էդուարդ Շևարդնաձեն հայտարարել է, որ Վրաստանը պետք է փոխի իր վերաբերմունքը Պուտինի և Ռուսաստանի նկատմամբ.
«Ես վրացական իշխանություններին կոչ եմ անում դադարեցնել Ռուսաստանի նորընտիր նախագահ Վլադիմիր Պուտինին հասցեագրած քննադատությունները: Եթե Վրաստանը փոխի իր վերաբերմունքը Պուտինի և Ռուսաստանի հանդեպ, ապա նա կունենա բարեկամաբար տրամադրված հարևան, առանց որի Վրաստանը չի կարող գոյատևել:
Սպառված չեն Ռուսաստանի հետ հարաբերությունների վերականգնման պաշարները: Կարծում եմ, որ բանակցությունների նախաձեռնողի դերում պետք է հանդես գա Վրաստանը: Այդ բանակցությունների քննարկման առարկան պետք է հանդիսանան Աբխազիան և Հարավային Օսիան: Բանակցությունների ժամանակ էլ հայտնի կդառնա, թե մեզ ինչ կառաջարկի Ռուսաստանը:
Եթե Վրաստանն ընդունի Ռուսաստանի՝ դիվանագիտական հարաբերությունների վերականգնման մասին առաջարկը, որոնք խզվել են 2008 թվականի օգոստոսյան պատերազմից հետո, ապա դա չի նշանակի, որ Վրաստանը ճանաչում է Աբխազիայի և Հարավային Օսիայի անկախությունը: Վրաստանի ժողովուրդը ցանկանում է վերականգնել Ռուսաստանի հետ հարաբերությունները»:
