Ճապոնիայի կայրս Ակիհիտոն շնորհակալություն է հայտնել աշխարհի երկրներին 2011թ. մարտի 11-ին տեղի ունեցած երկրաշարժից և ցունամիից հետո իրենց ցուցաբերված օգնության համար և հույս է հայտնել, որ ճապոնացիները կկարողանան վերականգնել տուժած տարածքները:
«Շատերը օգնության ձեռք մեկնեցին աղետից տուժածներին` սկսած նրանից, որ տարբեր երկրներից մեզ մոտ եկան փրկարարական ջոկատներ: Օտար պետությունների ղեկավարների ուղերձներում հաճախ խոսվում է այն մասին, թե ինչ տպավորություն է գործել նրանց վրա իրենց երկիրը վերականգնելու ճապոնացիների ձգտումը, նրանց ունակությունը՝ պահպանել մարդկային հարաբերությունները, չնայած ամենաբարդ պայմաններին:
Ես խորապես շնորհակալ եմ այն բարության համար, որ ցուցաբերեցին աշխարհի մարդիկ Ճապոնիային վրա հասած տարերային աղետից հետո»,- ասել է կայսրը երկրաշարժի զոհերի հիշատակին նվիրված միջոցառման ժամանակ:
Ճապոնիայի պատմության մեջ առաջին անգամ տարերային աղետի զոհերի հիշատակման արարողությունը կազմակերպվեց պետական մակարդակով: Միջոցառմանը մասնակցել են կայսեր ընտանիքը, վարչապետը և նրա կաբինետի անդամները:
Ճապոնիայի կայսր 78-ամյա Ակիհիտոն ներկա է գտնվել սգո միջոցառմանը, չնայած այն հանգամանքին, որ նա սրտի վիրահատությունից հետո գտնվում է վերականգնման շրջանում: Նա դժվարությամբ է մոտեցել սգո պատվանդանին և հակիրճ ելույթ է ունեցել:
