Մոզրովի քարանձավում մեծ փլվածքներ են եղել: Այս մասին «Թռչկան» քաղաքացիական նախաձեռնության ֆեյսբուքյան էջում տեղեկացնում է բնապահպան-ակտիվիստ Գոռ Հովհաննիսյանը`հավելելով, թե
հնարավոր է, որ մեկընդմիշտ կորցնենք քարանձավը: Ըստ նրա` մինչ այս հարցի լուծումը կտրականապես արգելվում է քարանձավին նույնիսկ մոտ գնալ:
Նա նաև նշել է, որ փորձելու են դիմել բոլոր հնարավոր մարմիններին ու պատասխանատու անձանց: Նախկինում Գոռ Հովհաննիսյանը նշել էր, որ ՀՀ կառավարության անտարբերության արդյունքում տեղի բնակիչները վերջին 20 տարիների ընթացքում գողացել և տարել են թիթեղյա ծածկոցը, իսկ անբարեխիղճ արշավախմբերը և այցելուները կոտրել մուտքի դուռը` անարգել ելումուտ անելու համար: Սակայն, նրա տեղեկացմամբ, քարանձավի գեղեցկությունը և յուրօրինակությունը իր խոնավության մեջ է, այդ պայմաններում են պահպանվում քարանձավներին հատուկ կարստային քարերը և միջավայրը:
Հիշեցնենք, որ Մոզրովի քարանձավը գտնվում է Արփի գյուղից դեպի Մոզրով գյուղ տանող ճանապարհի կողքին: Քարանձավը բացառիկ բնական հրաշք է: Քարանձավում հնարավոր է տեսնել անկրկնելի կարստային գոյացություններ` բազմագույն շիթաքարեր, կաթիլաքարեր, պտկաքարեր և աննման գեղեցկության բյուրեղներ: Աշխարհում նման գեղեցկության քարանձավները կարելի է մատների վրա հաշվել: ԽՍՀՄ շրջանում բազմաթիվ քարանձավախույզների և քարանձավագետների կողմից այն պաշտոնապես հայտարարվել է երբևիցե իրենց տեսած ամենագեղեցիկ քարանձավը: Մոզրովի քարանձավն ամբողջովին և մանրակրկիտ ուսումնասիրելու համար պահանջվում է ավելի քան 4-5 ժամ:
