«Ժառանգություն» կուսակցության պատգամավոր Անահիտ Բախշյանը թեպետ մասամբ է ծանոթ ՀՀԿ 13-րդ համագումարում հնչած Սերժ Սարգսյանի ելույթին, այնուամենայնիվ իր լսած հատվածներից եկել է այն եզրահանգման, որ այսօրվա համագումարի ամբիոնը ՀՀԿ-ն ծառայեցրել է որպես ինքնարդարացման հնարավորություն: Պատգամավորը նման տեսակետ հայտնեց «Առաջին լրատվական»-ի հետ զրույցում:
«ՀՀԿ-ն, այո, պետք է ասի, որ իրենց քննադատել են, բայց իրենք շատ լավ են աշխատել: Բնական է, որ նա պետք է արդարանա, բայց մյուս կողմից էլ ՀՀԿ նախագահ, երկրի ղեկավար Սերժ Սարգսյանն իր ելույթում ասում է. «Եթե մեկը գողանում է հանրությունից ու ազգից, ապա նաև գողանում է անձամբ իրենից և իր ընտանիքից»: Եթե հանրապետության նախագահը նման բան է ասում, նշանակում է գողանալու երևույթը ոչ միայն կա, այլ այնքան արմատացած ու խորացած է, որ Սերժ Սարգսյանը սեփական կուսակցության համագումարին անդրադառնում է դրան: Եթե նա խոսում է այս մասին, նշանակում է՝ փաստում է, որ նման մարդիկ կան: Եվ այդ մարդիկ ընդդիմադիրներ չեն, այլ իշխանության պաշտոնյաներ՝ նախարարներ և այլն»,- նկատեց պատգամավորը:
Անդրադառնալով ՀՀԿ ղեկավար Սերժ Սարգսյանի ելույթի այն հատվածին, ուր վերջինս խոսում է առաջիկա խորհրդարանական ընտրությունների մասին՝ Անահիտ Բախշյանը նշեց, որ լավ ընտրություններ անցկացնելու մասին հավաստիացումներն արժանահավատ չեն: «Մարդահամարի արդյունքում պարզվեց, որ ՀՀ քաղաքացիների թիվը հանրապետությունում պակասել է, բայց ընտրատարածքների թիվը, չգիտես ինչպես, ավելանում է: Ինչի՞ հաշվին. սա արդեն հուշում է, թե ինչ մեխանիզմներ են աշխատելու ընտրությունների օրը, թե Հայաստանում չգտնվող որքան մարդիկ են «քվեարկելու»»,- ասաց պատգամավորը:
Նշենք, որ այսօր՝ մարտի 10-ին, կայանում է ՀՀԿ 13-րդ համագումարը: Նախորդ՝ 12-րդ համագումարը տեղի է ունեցել 2009 թ. նոյեմբերի 28-ին:
