Հոլիվուդյան դերասան և իրավապաշտպան Ջորջ Քլունին մարտի 14-ին ամերիկացի սենատորներին կներկայացնի Սուդանում տիրող իրավիճակին վերաբերող զեկույց:
Դարֆուրում՝ Սուդանի արևմուտքում, 2003 թ.-ից շարունակվում են ռազմական գործողությունները Սուդանի կառավարության և ապստամբական խմբավորումների միջև: ՄԱԿ-ի տվյալներով՝ այդ ընթացքում զոհվել է շուրջ 300 հազար մարդ: Սուդանի կառավարությունը պնդում է, որ զոհերի թիվն ընդամենը մի քանի հազար է:
«Սուդանի և Հարավային Սուդանի անվտանգության հարցերով լսումները տեղի կունենան մարտի 14-ին: Գլխավոր զեկուցողը կլինի Ջորջ Քլունին»,- հայտնել են ԱՄՆ Սենատի միջազգային կոմիտեից:
Քլունին Satellite Sentinel Project կազմակերպության հիմնադիրներից մեկն է, որը զբաղվում է Սուդանի զինված խմբավորումների մասին տեղեկություններ հավաքելով և դրանց վերլուծությամբ: Քլունիի մոտ նման նախագծի գաղափար առաջացավ 2010 թ. հոկտեմբերին Սուդան այցելելուց հետո: ԱՄՆ վերադառնալուց հետո նա իր համախոհ Ջոն Փրենդերգաստի հետ ստեղծեց տվյալների բազա՝ ռազմական գործողությունների մասին վկայող արբանյակային լուսանկարների և տարածաշրջանից ստացվող տեղեկությունների հիման վրա: Նրանց կազմակերպությունը պարբերաբար պատրաստում է վերլուծական զեկույց Սուդանում տիրող իրավիճակի վերաբերյալ:
