Վարչապետի մարզային այցերը կարող են որպես աշխատանքային այցեր մեկնաբանվել: Այսօր «Առաջին լրատվական»-ի այն հարցին, թե վարչապետը մարզային այցերի ժամանակ չի զբաղվում արդյոք քարոզչությամբ Հանրապետական կուսակցության օգտին, նման կերպ պատասխանեց փաստաբան Արա Ղազարյանը:
Նա նշեց, որ փաստեր լինելու դեպքում կարող ենք ասել, որ վարչական ռեսուրս է օգտագործվում կուսակցության շահերի և քարոզչության համար: «Մարզային այցելությունները կարող են մեկնաբանել, որ դա իր առօրյա աշխատանքային այցերն են: Իսկ այս դեպքում փաստեր չկան, և հնարավոր չէ դա պնդել: Դա փաստ չի դիտվում, կարող է դիտարկվել, որ քողարկված քարոզարշավ է կամ վարչական ռեսուրսի օգտագործում, բայց հնարավոր չէ դա որպես փաստ համարել զուտ դատավարական իմաստով»,- նշեց փաստաբանը` հավելելով, որ ռեսուրսի օգտագործում է, երբ պետական մեքենաներով մարդկանց բերում են ընտրատեղամաս կամ առանց պաշտոնից հրաժարականի պաշտոնյան մասնակցում է քարոզարշավներին:
Ըստ Ա. Ղազարյանի`շատ դժվար է նույնիսկ որոշել, որ վարչական ռեսուրսն օգտագործվել է: Նրա խոսքով` միջազգային կառույցներն ավելի շատ ուշադրություն են դարձնում համակարգային խնդիրներին, քան տվյալ փաստին:
Հիշեցնենք, որ լրատվամիջոցներից մեկի հետ զրույցում ԿԸՀ նախագահ Տիգրան Մուկուչյանը նույնպես ՀՀ վարչապետ Տիգրան Սարգսյանի մարզային այցելությունները որպես Ընտրական օրենսգրքի խախտում չէր որակել:
