Մեծ Բրիտանիայի նախկին վարչապետ Գորդոն Բրաունը պայքար է սկսում վաղ ամուսնությունների դեմ, որոնք գետնին են հավասարեցբունմ աղքատության դեմ պայքարին և կրթության որակի բարձրացմանն ուղղված համաշխարհային ջանքերը: Այս հարցը նա արծարծել է իր հետազոտական հոդվածում, որից հատվածներ է մեջբերում բրիտանական The Guardian-ը:
2010 թ. վարչապետի պաշտոնը լքելուց հետո Գորդոն Բրաունը և նրա կինը՝ Սառան, ատիվորեն աջակցում են զարգացող երկրներում կրթության որակի բարձրացմանն ուղղված ծրագրերին՝ պայքարելով այդ երկրներում երեխաների տարրական գիտելիքների ձեռքբերման համար:
Բրաունը վիճակագրական տվյալներ է բերում, որոնց համաձայն՝ տարեկան ամուսնանում է մինչև 18 տարեկան 10 մլն աղջիկ, ընդ որում՝ դրանցից 1.5 մլն-ը մինչև 15 տարեկաններ են: Վաղ ամուսնությունները հատկապես մեծ տոկոս են կազմում Արևմտյան Աֆրիկայում. Նիգերում աղջիկների 36%-ն ամուսնանում է մինչև 15 տարեկանը: Հնդկաստանում տարեկան կտրվածքով աղջիկների 45%-ն ամուսնանում է մինչև 18 տարեկանը: Այդ ամենը հանգեցնում է վաղ հղիության, երեխաների և մայրերեի մահացության աճին, բացի այդ՝ նրանք ստիպված են լինում դուրս գալ դպրոցից:
«Ես շատ անհանգստացած եմ, թե որքան դանդաղ ենք մենք հասնում մինչև 2015 թ. աշխարհի բոլոր երեխաներին նորմալ տարրական կրթությամբ ապահովելու մեր նպատակին: 10 տարի առաջ երեխաների թիվը դպրոցներում կտրուկ մեծացավ, սակայն այդ աճի տեմպերն արագ նվազեցին»,- փաստում է նախկին վարչապետը:
Բրաունն առաջարկում է ստեղծել կրթության աջակցությանն ուղղված համաշխարհային ֆոնդ՝ ՁԻԱՀ-ի համաշխարհային հիմնադրամի նմանությամբ, որը գումար կհավաքի զարգացող երկրներում աղջիկ երեխաներին դպրոցներում պահելու համար:
«Օրենքի ընդունումը բավարար չէ: Պետք է բարձրացնել կրթության ֆինանսավորումը, աջակցել աղջիկներին ֆինանսապես, լավ դպրոցներ կառուցել, այդ թվում՝ գյուղական բնակավայրերում, անել հնարավոր ամեն բան, որպեսզի օգնենք երեխաներին հաղթահարել 13-14 տարեկանի սահմանը, երբ առավել հաճախակի են նրանց ամուսնացնում»,- գրում է Բրաունը:
Նախկին վարչապետը հույս ունի, որ միջազգային հանրությունը կլսի իր կոչը և միջազգային գագաթնաժողով կհրավիրի այս խնդրի հետ կապված՝ քննարկելու համար աղքատ երկրներում երեխաների կրթության ոչ բավարար ֆինանսավորման հարցը:
