Հայաստանի հանքարդյունաբերության ոլորտը թերհարկվում է: Այս մասին այսօր լրագրողների հետ հանդիպման ժամանակ ասաց Համաշխարհային բանկի Հայաստանի գրասենյակի ղեկավար Ժան-Միշել Հապին: Ըստ նրա՝ թեև այս ոլորտը նպաստում է նոր աշխատատեղերի ստեղծմանը, բայց խնդիրներ կան շրջակա միջավայրի, սոցիալական հաշվետվականության, հարկային ռեժիմի հետ կապված։
Նշենք, որ այժմ Ազգային ժողովում քննարկվում է «Ընդերքի մասին» օրենքում փոփոխություններ կարարելու նախագիծ: ՀԲ տնտեսագետ Գոհար Գյուլումյանի խոսքով, բնօգտագործման վճարը պետք է ավելացնել 2 կամ 3 անգամ: Ըստ նրա, անհրաժեշտ է, որ հանքարդյունաբերողներից նաև միջազգային գների աճին համապատասխան հաստատագրված վճար գանձվի: Հակառակ դեպքում, միջազգային գների բարձրացումը, ըստ Գյուլումյանի, հսկայական գերշահույթներ է ապահովում ոլորտին, ինչպես տեղի ունեցավ 2004-2008 թթ.։