Հայաստանը որոշակիորեն առողջացել է, կառավարությունը վարում է կայուն, լավ իրականացված ֆիսկալ քաղաքականություն, որը թույլ տվեց, որ սղաճն իջնի: Այսօր լրագրողների հետ հանդիպման ժամանակ նման գնահատական տվեց Վերակառուցման և զարգացման եվոպական բանկի` Թուրքիայի, Արևելյան Եվրոպայի, Կովկասի և Միջին Ասիայի գծով գլխավոր տնօրեն Օլիվյե Դեկամպը: Ըստ նրա` սա նվազեցրել է դեֆիցիտի մակարդակը ավելի շատ, քան ակնկալվում էր: Սակայն, Օ. Դեկամպի խոսքով՝ աշխարհում կան «դեմքին խփող քամիներ», և Հայաստանում կարող է տնտեսության աճը դանդաղել:
«Մենք էությամբ պահպանողական ենք, մոտ 3% և մի քիչ ավելի ենք կանխատեսում ՀՀ ՀՆԱ աճը: Նաև սղաճն էր բարձր, կարծում էինք, որ ավելի քիչ կլինի»,- նշեց Օ. Դեկամպը` հավելելով, որ մեծ շուկաները կարող են դանդաղել, արտարժույթի շուկաները կարող են տատանվել և պետք է զգույշ լինել կանխատեսումների մեջ:
ՎԶԵԲ ներկայացուցիչը դրական գնահատեց երկրի իրական հատվածի աճը` արդյունաբերության, գյուղատնտեսության, սպասարկումների ոլորտում: 2011 թ. ՀՀ-ում բանկի վարկային պորտֆելի աճը մոտ 40% է: Օ. Դեկամպը հայտնեց, որ ՎԶԵԲ-ը մոտ 100 մլն դոլարի վարկ է տվել բանկերին:
«Առաջին լրատվական»-ի հարցին` ինչպե՞ս եք գնահատում ՀՀ-ում ներդրումների պաշտպանվածության մակարդակը և ի՞նչ փոփոխություններ եք արձանագրել կոռուպցիայի առումով, Օ. Դեկամպը պատասխանեց, որ ներդրումների պաշտպանվածությունն առաջին հերթին պետք է դիտարկել ներդրումային միջավայրի մասով և իրենք դրական են գնահատում ներդրումային միջավայրի բարեփոխումները` բիզնեսի գրանցման, Տնտեսական մրցակցության պաշտպանության պետական հանձնաժողովի լիազորությունների ընդարձակման առումով, ՓՄՁ խորհրդի ստեղծման առումով:
«Ասել, որ սա բավարար է, ոչ, բավարար չէ երբևէ: Շարունակաբար, քայլ առ քայլ պետք է առաջ գնալ: ՎԶԵԲ-ը, լինելով բարեփոխումների ջատագով, կառավարության հետ քննարկում, վեր է հանում խնդիրները»,- ասաց Օ. Դեկամպը` շեշտելով, որ միջավայրի բարելավումը պետք է շարունակվի` կառավարության և բիզնեսի համագործակցությամբ: Ըստ նրա` կոռուպցիայի դեմ պայքարը ՀՀ կառավարության օրակարգում է:
Օ. Դեկամպը հայտնեց, որ ՀՀ էներգետիկայի և բնական պաշարների նախարար Արմեն Մովսիսյանի հետ այսօր ստորագրել են «Հայաստանում կայուն էներգիայի ոլորտին ուղղված գործողությունների ծրագրի» վերաբերյալ փոխըմբռնման հուշագիր: Այն կօգնի ՀՀ-ին` նվազեցնել երկրի տնտեսության էներգատարողության մակարդակը և սատարել էներգաարդյունավետությանն ուղղված ներդրումների իրականացմանը տնտեսության տարբեր հատվածներում:
