Ադրբեջանական Turan լրատվական գործակալության փոխանցմամբ՝ Ադրբեջանը հեռուստաալիքների ու ռադիոկայանների թվով զիջում է հարևան Հայաստանին ու Վրաստանին: Այս մասին հայտարարել է Yeni Nesil լրագրողական միավորման նախագահ Արիֆ Ալիևը:
Վերջինիս խոսքերով՝ ավելի քան 9 միլիոն բնակչություն ունեցող Ադրբեջանում գործում է 21 հեռուստաալիք, որոնցից 7-ը՝ հանրապետական, իսկ 14-ը՝ շրջանային: Դրանք հիմնականում բաժին են ընկնում երկրի հյուսիսային, հարավային և արևմտյան շրջաններին, ինչը չի կարելի ասել կենտրոնական շրջանների, ինչպես նաև Ղարաբաղյան գոտու պարագայում:
Միևնույն ժամանակ, Ադրբեջանում գործում է 14 ռադիոկայան, որոնցից 13-ը բաժին են ընկնում Բաքվին, իսկ 1-ը՝ Նախիջևանին: Այս ցուցանիշներով Ադրբեջանը զիջում է Վրաստանին ու Հայաստանին՝ չնայած եկամտի, նյութական և մարդկային ռեսուրսների առավելությանը:
4 միլիոն բնակչություն ունեցող Վրաստանում գործում է 57 հեռուստաալիք և 44 ռադիոկայան, իսկ 3 միլիոն բնակչություն ունեցող Հայաստանում՝ 42 հեռուստաալիք և 30 ռադիոկայան: Բացի այդ, Վրաստանում տպագրվող շրջանային թերթերի շաբաթական տպաքանակը կազմում է 55,000, Հայաստանինը՝ 30,000, իսկ Ադրբեջանինը՝ 17-18,000 օրինակ:
