Այսօր կառավարության նիստում հաստատվեց Դալմայի այգու տարածքում նոր ավտոմայրուղի կառուցելու մասին որոշումը: Ինչպես ներկայացրեց քաղաքապետ Տարոն Մարգարյանը, Մալաթիա-Սեբաստիա վարչական շրջանում՝ Ծովակալ Իսակովի պողոտայի և Լենինգրադյան փողոցի միջև, ավտոմայրուղի կառուցելու նպատակով Երևանի քաղաքապետի առաջարկությամբ «Սահակյանշին» ՓԲԸ-ին ուղղակի վաճառքի ձևով Ծովակալ Իսակովի պողոտային հարող հատվածում 5.3 հա հողամաս կօտարվի, որից ստացված միջոցներն ամբողջությամբ կուղղվեն Երևան քաղաքում Ծովակալ Իսակովի պողոտայի և Լենինգրադյան փողոցի միջև ընկած հատվածում 2.6 կմ երկարությամբ ավտոմայրուղու և շուրջ 1.9 կմ ուղետարների կառուցման կապիտալ ծախuերի ֆինանuավորմանը։
Շինաշխատանքները նախատեսվում է ավարտել մինչև 2013 թվականի փետրվարի 1-ը:
Նախագծով նախատեսվում է երկու տրանսպորտային հանգույցների մասնակի լուծում` Ծովակալ Իսակովի պողոտայի և Լենինգրադյան փողոցի հատումներում: Ծովակալ Իսակովի պողոտայի հատվածի տրանսպորտային հանգույցը հետագայում կզարգանա (2-րդ փուլ) մայրուղու շարունակությունը նախատեսող՝ «Երևան Բերդ» նախագծային թաղամասի եզրով և Հրազդան գետի վրայով` ապահովելով ելք դեպի Արշակունյաց պողոտա: Լենինգրադյան փողոցի հետ միացման հանգույցը հետագայում ևս կզարգանա` Տիչինայի փողոցի շարունակությամբ միանալով Սեբաստիա փողոցի հետ:
Մայրուղուն զուգահեռ՝ նախատեսվում է ջրատարի, հեղեղային և կենցաղային կոյուղու, գազատարի և արտաքին լուսավորության, կապի ստորգետնյա մագիստրալ հաղորդակցուղիներ կառուցում:
Ներկայումս «Երևաննախագիծ» ՓԲԸ-ի կողմից կազմվել է նշված ավտոմայրուղու տեխնիկական նախագիծը: Ավտոմայրուղին անցնում է Դալմայի այգիների անտառային ֆոնդի հողերի սահմանով՝ Ծիծեռնակաբերդի խճուղուց դեպի հարավ-արևմուտք ընկած տարածքով:
Ավտոմայրուղու կառուցման արդյունքում նշված տարածքում առաջանում է 5.3 հա ազատ հողամաս, որը գտնվում է Մալաթիա-Սեբաստիա վարչական շրջանում՝ անմիջապես Կենտրոն վարչական շրջանի սահմանին հարակից: Երևան քաղաքի գլխավոր հատակագծի համաձայն՝ նշված տարածքն ընդգրկված է նախագծային ավտոմայրուղու բուֆերային (անցումային) հատվածում:
