Թուրքական Sabah թերթի փոխանցմամբ՝ Թուրքիայի վարչապետ Ռեջեփ Էրդողանը թույլատրել է հետաքննություն սկսել Ազգային հետախուզական կազմակերպության (MIT) աշխատակից, Սիրիայի ազատ բանակի հիմնադիր, գնդապետ Հուսեին Մուսթաֆա Հարմուշի նկատմամբ, ով գտնվում է հետախուզման մեջ:
Էրդողանին համապատասխան խնդրանքով դիմել էր Ադանայի դատախազությունը: Ոստիկանության ու դատախազության ներկայացրած նյութերին ծանոթանալուց հետո MIT-ը Հարմուշին վտարել է իր շարքերից:
Փետրվարի 25-ին MIT-ը ձերբակալել էր Սիրիայի հատուկ ծառայությունների երկու աշխատակիցների և նրանց օժանդակած մի շարք թուրքերի:
Հիշեցնենք, որ փետրվարի 17-ին Թուրքիայի նախագահ Աբդուլլահ Գյուլը հաստատել է Թուրքիայի Ազգային մեծ ժողովի (ԹԱՄԺ) ընդունած ու իր հաստատմանը ներկայացրած Պետական հետախուզական ծառայությանն ու MIT-ին առնչվող օրենքում ուղղումներ մտցնելու մասին օրինագիծը:
Օրինագծի համաձայն՝ MIT-ի աշխատակիցների կամ էլ վարչապետի կողմից հատուկ հրահանգներ ստացած (MIT-ը չներկայացնող) անձանց կողմից իրենց առաջադրանքների կատարման ժամանակ հանցագործություն գործելու համար հետաքննություն պետք է իրականացվի վարչապետի թույլտվությամբ:
