«Մենք արդեն 15 տարի է՝ աշխատում ենք կանանց բռնությունների կանխարգելման ոլորտում: Այդ տարիների ընթացքում մշակել ենք մի շարք ծրագրեր՝ օգնելու համար ընտանեկան բռնության ենթարկված կանանց:
Առաջինը ազգային թեժ գիծն է, որը գործում է շուրջօրյա: Կինը, զանգահարելով թեժ գիծ, կարող է ստանալ թե՛ հոգեբանական, թե՛ իրավաբանական անվճար խորհրդատվություն»,- լրագրողների հետ հանդիպմանը տեղեկացրեց Կանանց իրավունքների կենտրոնի հասարակայնության հետ կապերի պատասխանատու Դիանա Սարգսյանը:
Նա նշեց, որ 2011 թվականի ընթացքում գրանցվել է 2032 զանգ, որից 1678-ը՝ ընտանեկան բռնության վերաբերյալ, իսկ դրանցից 1142-ն էլ վերաբերել են հոգեբանական բռնությանը, 612-ը՝ ֆիզիկական, 24-ը՝ սեռական: Ճգնաժամային կենտրոններ և թեժ գիծ գործում են ՀՀ չորս մարզերում` Գեղարքունիք, Սյունիք, Տավուշ, Լոռի:
«Թեև այստեղ թեժ գիծը շուրջօրյա չէ, բայց, այնուամենայնիվ, անում ենք ամեն ինչ բռնության ենթարկված կանանց օգնություն ցուցաբերելու համար: 4 ճգնաժամային կենտրոններում ընդհանուր առմամբ գրանցվել է 1247 զանգ»:
Ըստ կենտրոնի հոգեբան Աննա Հակոբյանի՝ կանայք իրենց են դիմում հոգեբանական տարբեր իրավիճակներում: «Իհարկե, մեծամասնությունը այն դեպքերն են, երբ դանակն արդեն ոսկորին է հասել, հատկապես դիմում են այն կանայք, որոնց համար ընտանիքում գտնվելը արդեն վտանգավոր է»:
Նա նշեց, որ պետք չէ այդ խնդիրը ազգայնացնել, քանի որ նման իրավիճակներ կարող են լինել և զարգացած, և թերզարգացած երկրներում: «Պարզապես այդ երկրների կանանց համեմատ հայ կնոջ համար շատ կարևոր է ընտանեկան ամբողջականությունը: Միայն դա է պատճառը, որ կինը հաճախ հանդուրժում է սարսափելի զրկանքներ»:
Կենտրոնի իրավաբան Սաթենիկ Գևորգյանը խոսելով օրենսդրական դաշտի մասին՝ նշեց, որ Հայաստանը միացել է մի շարք միջազգային կոնվենցիաների, որոնք վերաբերում են կանանց իրավունքների պաշտպանությանը:
«Այս միջազգային կոնվենցիաները համալիր իրավական ակտեր են, որոնք շատ հարցերի տալիս են պատասխաններ, սակայն միջազգային այս նորմերով Հայաստանում շատ քիչ են առաջնորդվում»:
2007 թվականին Կանանց իրավունքի կենտրոնի նախաձեռնությամբ ստեղծվել և մշակվել է կանանց իրավունքների վերաբերյալ նախագիծը: Այն ընտանեկան բռնությունների կանխարգելման միակ ակտն է Հայաստանում: Ներկայումս օրենքի նախագիծը պետք է ներկայացվի կառավարությանը, հավանության արժանանալու դեպքում ուղարկվի Ազգային ժողով:
«Այս օրենքն ունի միայն կանխարգելիչ բնույթ, այն չի սահմանում պատժամիջոցներ, քանի որ դիտավորյալ բռնություն գործադրելու համար Քրեական օրենսգիրքը սահմանում է համապատասխան պատիժ:»
Ըստ հոգեբան Աննա Հակոբյանի՝ ընտանեկան բռնությունը դիտավորություն է և նախօրոք ծրագրված:
Հասարակայնության հետ բաժնի պատասխանատու Դիանա Սարգսյանը հավելեց, որ կենտրոնում զանգերի քանակը ավելացել է, իսկ «պատճառը ոչ թե ընտանեկան բռնությունների թվի աճն է, այլ պարզապես բարձրացել է կանանց իրազեկվածության մակարդակը»:
