Գողության մեջ մեղադրվող կալանավորների քննչական գործի քննությունը Տավուշի մարզի քննչական բաժնից տեղափոխվել է Լոռվա մարզ: Ըստ մեղադրյալների դատապաշտպան Կարինե Գասպարյանի` գլխավոր դատախազության այս որոշման կայացմանը նպաստել են նաև իր բազմաթիվ բողոքները:
Հիշեցնենք, որ մեղադրյալներ Վարդան Աթոյանն ու Գևորգ Ադամյանը սեպտեմբերի 28-ից կալանքի տակ են գտնվում ընդամենը մեկ անձի` Էդվարդ Քոսակյանի ինքնախոստովանական ցուցմունքի հիման վրա: Քոսակյանը խոստովանել է, որ կատարել է առանձնապես խոշոր չափերով գողություն և նշել, որ Աթոյանն ու Ադամյանը իր հանցակիցներն են եղել: Այսպես` հանցանքը խոստովանած Քոսակյանը ազատության մեջ է, իսկ Աթոյանին ու Ադամյանին սպառնում է 4-8 տարի ազատազրկում:
Նախաքննության մարմինը մանրաթելային փորձաքննության է ենթարկել Քոսակյանի ընկերներից մեկի տան մոտ հայտնաբերված դիմակը, որը գործի կարևոր հանցանշանն է, քանզի ենթադրվում է, որ հանցագործության օրը այն կրել է տղաներից մեկը: Դիմակի վրա մազ է գտնվել, որն ուղարկվել էր, որպեսզի պարզեն, թե տղաներից որևէ մեկի մազը համընկնո՞ւմ է գտնված մազի հետ:
Ըստ փորձաքննական եզրակացության` դիմակի վրայի մազը կարող է լինել ինչպես Վարդան Աթոյանինը, այնպես էլ Էդվարդ Քոսակյանինը:
Դատապաշտպան Կ.Գասպարյանը այս առիթով բողոք է ներկայացրել գլխավոր դատախազությանը, քանզի փորձաքննության այս պատասխանը չի ապացուցում իր պաշտպանյալի մեղքը:
Նշենք, որ ամբաստանյալների նախնական կալանքի ժամկետը սպառվում է հունվարի 22-ին, սակայն այն հնարավոր է երկարաձգվի: