«Նորաշեն 2007»-ի գործով շուրջ 200 խաբված բնակարանատերերը այսօր ևս մեկ անգամ ապարդյուն հասան Աջափնյակ և Դավթաշեն վարչական շրջանների ընդհանուր իրավասության դատարան և զայրացած վերադարձան, ինչպես իրենք էին նշում՝ «կրկին փողոցներ»:
Արդեն երրորդ անգամ այս գործով դատական նիստը չի կայանում պաշտպաններից մեկի բացակայության պատճառով, իսկ այսօր նիստից բացակայում էր ամբաստանյալներից Դավիթ Երեմյանի պաշտպան Լիանա Գրիգորյանը` վատառողջ լինելու պատճառաբանությամբ: Ու թեև ամբաստանյալը դատարանին հայտնեց, որ դեմ չէ առանց պաշտպանի նիստը շարունակելուն, նախագահող դատավոր Վազգեն Ռշտունին պնդեց, որ պաշտպանի բացակայությամբ նիստ շարունակելու իրավունք օրենսդրությամբ վերապահված չէ, ինչին չառարկեց նաև մեղադրող դատախազ Հարություն Հարությունյանը:
Հիշեցնենք, որ այս գործով դեռ նախորդ դատական նիստի ժամանակ որոշվել էր, որ յուրաքանչյուր նիստին հերթականությամբ կհարցաքննվի 10 վկա, ինչին միայն կհաջորդի ապացույցների հետազոտման փուլը:
Հաշվի առնելով դատավարության ձգձգումները՝ դատավոր Վազգեն Ռշտունին այսօր դատարանում հավաքված տուժողներին առաջարկեց մասնատել գործը և, որպեսզի յուրաքանչյուր նիստին այսքան մարդ չգա ու երբեմն էլ՝ անիմաստ, յուրաքանչյուր նիստին ծանուցվի հերթական 10 վկայություն տվողին, իսկ արդեն վերջում, երբ գործը կհասնի ապացույցների հետազոտմանը, դատարանում ներկա կլինեն արդեն բոլոր տուժողները: Ըստ երևույթին, դատարանում հավաքված տուժողների բազմությունը կողմ էր դատավորի առաջարկին, մանավանդ, որ գործի ձգձգումների վերաբերյալ բնակիչների բողոքներին ի պատասխան դատավորը հիշեցրեց, որ հաշվի առնելով դատավարությանը մասնակցող անձանց քանակը՝ գործը երկար կքննվի. «Կա մոտ 200 տուժող և 100-ից ավելի վկա»:
Դատավորը և մեղադրող դատախազը ամբաստանյալներին կարգադրեցին այսուհետ կամ պաշտպանների հետ պայմանավորվածություններն այնպես դասավորել, որ նիստերն անիմաստ հետաձգելու պատճառ չստեղծվի, կամ էլ ունենալ 2 պաշտպան:
Ի դեպ, դատարանը որոշեց, որ այսուհետ դատաքննությունը հնարավորինս արագ կազմակերպելու համար շաբաթվա ընթացքում այս գործով 2 դատական նիստ կհրավիրվի, և բոլորն էլ ժամը 12.30-ին: Գործով հաջորդ նիստը նշանակված է մարտի 16-ին է:
Հիշեցնենք, որ այս գործի շուրջ աղմուկ էր բարձրացել այն բանից հետո, երբ պարզվել էր որ 120-ից ավելի ընտանիքներ «Նորաշեն-2007» սպառողական կոոպերատիվին գումար են վճարել նորակառույցում բնակարան ունենալու նպատակով, բայց հետագայում պարզել են, որ իրենց խոստացված բնակարանները այլ մարդկանց են վաճառվել:
Գործով որպես տուժող և վկա անցնում են շուրջ երեք հարյուր անձինք: Գործի հետ կապված շրջանառվում են մի շարք բարձրաստիճան անձանց անուններ, որոնք էլ, ըստ բնակիչների, մեղավոր են իրենց հետ տեղի ունեցածի համար:
ՀՀ ՀՔԾ կողմից գործի վերաբերյալ նախկինում տարածված հաղորդագրության մեջ ասվում էր, որ մինչդատական վարույթում ձեռք բերված ապացույցների հիման վրա կոոպերատիվի նախագահ Ա. Թադևոսյանին մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով և 205-րդ հոդվածի 2-րդ մասով, Լ. Սամվելյանին՝ ՀՀ քրեական օրենսգրքի 178-րդ հոդվածի 3-րդ մասի 1-ին կետով, Ա. Մարտիրոսյանին՝ ՀՀ քրեական օրենսգրքի 178-րդ հոդվածի 3-րդ մասի 1-ին կետով և 213-րդ հոդվածի 2-րդ մասի 1-ին և 2-րդ կետերով, Ց. Պետրոսյանին՝ ՀՀ քրեական օրենսգրքի 38-178-րդ հոդվածի 3-րդ մասի 1-ին կետով, իսկ Վ. Օհանյանին և Դ. Երեմյանին՝ ՀՀ քրեական օրենսգրքի 213-րդ հոդվածի 2-րդ մասի 1-ին և 2-րդ կետերով:
