Լիբիայում վերջին մեկ տարվա ընթացքում ռազմական հանցագործություններ իրականացրել են թե՛ իշխանությունները, թե՛ հակակառավարական ուժերը: Այս եզրակացությանն է հանգել ՄԱԿ-ի հատուկ հանձնաժողովը, որը ստեղծվել էր հեղափոխության ժամանակ Լիբիայում իրականացված հանցագործությունները հետաքննելու նպատակով: Այս մասին հաղորդում է «Ազատություն» ռադիոկայանը:
Հանձնաժողովի զեկույցում նշվում է, որ Քադաֆիին հավատարիմ զորքերը պարբերաբար հարձակվել են խաղաղ բնակչության վրա, և նրանք են պատասխանատվություն կրում սպանությունների, խոշտանգումների և բռնաբարությունների համար: Ընդդիմության զորքերն էլ իրենց հերթին, առանց դատարանի որոշման, մահապատիժներ են իրականացրել, ինչպես նաև իրենց հակառակորդներին ենթարկել են խոշտանգման:
Հանձնաժողովը նաև կարծիք է հայտնել, որ ՆԱՏՕ-ի կողմից իրականացված ռմբակոծությունները եղել են կետային: Դրանով նրանք փորձել են նվազագույնի հասցնել զոհերի թիվը խաղաղ բնակչության շրջանում:
ՄԱԿ-ի հանձնաժողովին չի հաջողվել պարզել Սիրթ քաղաքի մերձակայքում Լիբիայի նախկին առաջնորդ Մուամար Քադաֆիի սպանության իրական հանգամանքները:
