«Նյույորքյան Solomon Guggenheim թանգարանը գրանտ է ստացել՝ Պաբլո Պիկասսոյի «Արդուկ անող կինը» նկարն ուսումնասիրելու համար (1904, Woman Ironing)»,– գրում է The New York Times-ը: Հայտնի է, որ նկարի տակ կա ևս մի պատկեր` տղամարդու դիմանկար` արված Պիկասոյի կողմից: Այն հայտնաբերվել է ռենտգենի միջոցով, սակայն անհրաժեշտ միջոցների բացակայության պատճառով նկարի ուսումնասիրությունն անընդհատ հետաձգվում էր:
Դիմանկարում պատկերված է բեղերով տղամարդ: Գիտնականները ենթադրում են, որ Պիկասոն ինքնադիմանկար է արել, սակայն ոմանք էլ կարծում են, որ նա իր դերձակ ընկերոջ` Բենետ Սոլերի դիմանկարն է կերտել: Ուսումնասիրության գլխավոր խնդիրը բնորդի ինքնությունը որոշելն է:
Պիկասոյի կենսագիրը հարցազրույցում նշել է, որ այդ շրջանում նկարիչը հաճախ է կտավների վրա կրկնակի նկարել, որպեսզի նոր կտավ չգնի, քանի որ դրանք թանկ արժեին: Ենթադրվում է, որ «Արդուկ անող կինը» պատկերի տակ թաքնված է Պիկասոյի ստեղծագործական կյանքի մեկ այլ շրջանի նկար:
Գրանտը թանգարանին տվել է Bank of America-ն: Նախատեսվում է, որ այդ գումարով կուսումնասիրվեն նկարի ստորին շերտերը, բացի այդ՝ ստեղծագործությունը կվերականգնվի: Կտավում պատկերված է նիհար, գունատ կին, ով դժվարությամբ է պահում երկաթե արդուկը: Այս ստեղծագործությունը կցուցադրվի Հուգգենհայմի «Պիկասսո. սև և սպիտակ» ցուցահանդեսի ժամանակ:
