«НТВ հեռուստաընկերությունը որոշել է եթերից հանել գերմանացի ռեժիսոր Հուբերտ Զայպերի «Ես` Պուտինս. դիմանկար» փաստագրական ֆիլմը, որը պետք է ցուցադրվեր մի քանի ժամ առաջ, այսպես կոչված, «լռության օրից», երբ արգելված է քաղաքական ցանկացած ագիտացիան»,– հաղորդում է РИА Новости-ն՝ հղում անելով հեռուստաալիքի մամլո ծառայությանը:
««Ես` Պուտինս. դիմանկար» փաստագրական ֆիլմի՝ «լռության փուլից» մի քանի ժամ առաջ НТВ–ի ցանցում հայտնվելը (եթերը նախատեսված էր մարտի 2–ին, 21.30) դժգոհություն էր առաջացրել ինչպես ԿԸՀ անդամների, այնպես էլ նախագահական մրցավազքի մասնակիցների մոտ»,- նշել են մամլո ծառայությունում:
Այդ իսկ պատճառով հեռուստաալիքը որոշել է ֆիլմի ցուցադրությունը տեղափոխել հետընտրական շրջան:
Հիշեցնենք, Հուբերտն իր ֆիլմը նկարահանել է մի քանի ամիսների ընթացքում: Ինչպես նշում են մի շարք արևմտյան ԶԼՄ-ներ, գերմանական ռեժիսորի աշխատանքում կներկայացվի մի քիչ այլ, ավելի «մարդկային» Պուտինը: Վարչապետի մամլո ծառայությունից վստահեցնում են, որ չեն գրաքննել ֆիլմը և չգիտեն, թե երբ են այն եթերով ցուցադրելու:
