«Հայաստանում տնտեսությունը վարում են կարկատանային եղանակով: Անցած տարի ընդհանուր գնաճը 4.5% էր, բաց սննդինը՝ 14%, նույնիսկ առանձին ապրանքների գծով 25% էր»,- այսօր լրագրողների հետ հանդիպմանը հայտարարեց Հայաստանի սպառողների ասոցիացիայի նախագահ Արմեն Պողոսյանը:
Նա նշեց, որ Ազգային վիճակագրական ծառայությանը բազմիցս առաջարկել են առանձնացնել առաջին անհրաժեշտության ապրանքները և տալ դրանց դինամիկան:
Նրա խոսքով՝ նախկինում ուսումնասիրում էին 400, այժմ 900 անուն ապրանքներ: ՀՀ-ում սպառողն իր եկամտի 60%-ը տալիս է սննդին, մինչդեռ, Ա. Պողոսյանի կարծիքով, եթե եկամտի 25%-ը ծախսվում է սննդի վրա, ապա նորմալ երկրներում քաղաքացուն արդեն սոցիալական աջակցություն է տրամադրվում:
«Ո՞վ կարող է ճշտել, որ նույն հացը 180 դրամ էր երեկ և 180 դրամ է այսօր, բայց ո՞վ կարող է ասել, թե այդ հացի քաշն ինչպե՞ս է փոփոխվել»,- ասաց Ա.Պողոսյանը՝ հավելելով, որ ՀՀ-ում գների թանկացումը, ցավոք, չի կարելի օբյեկտիվ համարել: