Մարտի 1-ի իրադարձություններից ամենաշատը դասեր քաղել է ընդդիմությունը, իսկ ահա իշխանությունը ոչ մի դաս էլ չի քաղել: «Առաջին լրատվական»-ի հետ զրույցում նման տեսակետ հայտնեց «Ժողովրդավարական հայրենիք» կուսակցության նախագահ, ՀԱԿ ներկայացուցիչ Պետրոս Մակեյանը:
«Դասեր քաղել ասվածը պետք է դիտարկել տարբեր հարթություններում: Մի հարթությունը վարչախումբն է, երկրորդը՝ հասարակությունը, մյուսը՝ ընդդիմությունը: Դատելով իշխանության կեցվածքից, նաև Ռոբերտ Քոչարյանի ակտիվացումից և իր ուժերի՝ «Բարգավաճ Հայաստան» կուսակցության շուրջ համախմբումից, կարծում եմ՝ նրանք ոչ մի դաս էլ չեն քաղել, ընդհակառակը, պատրաստ են նորից կրկնել նույնը: Ինչ վերաբերում է հասարակությանը, ապա նա որոշակիորեն հասունացել է, քաղաքացիական հասարակության որոշակի շերտ է ի հայտ գալիս, սակայն դա դեռևս բավարար չէ: Ընդդիմությունը դասեր քաղել է չափից ավելի, զգոնացել և զգուշանում է, ինչն իմ կարծիքով բացասական է:
Ընդդիմությունը հասարակությանը պետք է տաներ մի հարթություն, որ իշխանությունները, ի դեմս նախկին նախագահ կոչված Ռոբերտ Քոչարյանի, երբեք չմտածեին ակտիվ քաղաքականություն վերադառնալու մասին: Ընդդիմությունը, երևի, թույլ տվեց դա, դա նրա թերացումն էր»,- ամփոփեց Պետրոս Մակեյանը:
