Իլիա Բ-ն ջերմորեն ընդունեց վիրահայ պատվիրակությանը

11 Հունվար, 2011 12:33

Դիտումներ՝ *

Սույն թվականի հունվարի 10–ին Վրաստանի հայ համայնքի ներկայացուցիչները՝ առաջնորդությամբ Վիրահայոց թեմի առաջնորդ Տ. Վազգեն եպիսկոպոս Միրզախանյանի և Վրաստանում ՀՀ արտակարգ և լիազոր դեսպան Հրաչ Սիլվանյանի, այցելեցին Վրաց ուղղափառ եկեղեցու պատրիարքարան, ուր նրանց դիմավորեց Վրաց եկեղեցու միջեկեղեցական հարաբերությունների պատասխանատու Գերասիմ միտրոպոլիտը և ուղեկցեց պատրիարքի պաշտոնական ընդունարան:
Նորին սրբություն Իլիա Բ-ն ջերմորեն ընդունեց վիրահայ պատվիրակությանը և Վրաց եկեղեցու անունից շնորհավորեց հայ ժողովրդին և Հայ եկեղեցուն, Ամենայն Հայոց կաթողիկոսին, ՀՀ նախագահին Նոր տարվա և Սուրբ Ծննդյան տոների առիթով: Հանդիպմանը շնորհավորական և ողջույնի խոսքով հանդես եկան թեմի առաջնորդ Տ. Վազգեն եպիսկոպոս Միրզախանյանը, ՀՀ արտակարգ և լիազոր դեսպան Հրաչ Սիլվանյանը, «Վրաստան» թերթի գլխավոր խմբագիր Վան Բայբուրթյանը, Վրաստանի հայտնի մտավորական և հասարակական գործիչ Գիվի Շախնազարը և Վրաստանում հայ գործարարների միության ներկայացուցիչ Սամվել Աղեկյանը։ Վիրահայ պատվիրակությունը Համայն Վրաց պատրիարքին փոխանցեց վրացահայ հայտնի գեղանկարիչ Լև Բոյախչևի աշխատանքը: Հանդիպմանը մասնակցում էին նաև Վրաստանի հայ գործարարների միության ներկայացուցիչներ և պատրիարքական փոխանորդ Թեոդոր միտրոպոլիտը:
Հանդիպումը անցավ շատ ջերմ մթնորլորտում: Համայն Վրաց պատրիարք Իլիա Բ-ն մեկ անգամ ևս իր հարգանքը և բարեկամական սերը արտահայտեց ողջ հայության հանդեպ և հորդորեց հավատարիմ մնալ դարերից եկող հայ-վրացական եղբայրությանն ու բարեկամությանը՝ հույս հայտնելով, որ միասնական ուժերով կհաղթահարվեն մեր եկեղեցիներին և ժողովուրդներին հուզող հարցերը:
Իլիա պատրիարքը վիրահայ պատվիրակությանը պատրիարքարանի մառանից գինի նվիրեց` հույս հայտնելով նաև, որ այս տարի կկայանա Նորին սրբություն Գարեգին Բ-ի եղբայրական այցը Վրաստան, ու վստահեցնելով, որ ինքը պատրաստ է ջերմորեն ընդունել Ամենայն Հայոց կաթողիկոսին և վերահաստատել հայ-վրացական եկեղեցական հնամենի բարեկամությունը:
Վիրահայոց թեմի մամլո դիվան