1901թ. այս օրը Արևմտյան Հայաստանի Ռշտունիք գավառի Պախվանց գյուղում ծնվեց արվեստի վաստակավոր գործիչ, բանաստեղծ, ՀԽՍՀ մշակույթի վաստակավոր գործիչ (1967թ.), ԽՍՀՄ գրողների միության անդամ (1934-ից) Սարմենը (Արմենակ Սարգսյան):
Նրան Սարմեն գրական անունով է կնքել իր ուսուցիչ Եղիշե Թերլեմեզյանը: Սարմեն անունը կազմված է բանաստեղծի ազգանվան առաջին վանկի (Սար) և անձնանվան երկրորդ վանկի (մեն) մեկտեղումից:
Նրա ծնողները զոհվել են 1915-ի Մեծ եղեռնի ժամանակ։ Սարմենի մանկությունն անցել է մանկատներում։ 1932-ին ավարտել է Երևանի համալսարանի լեզվագրական ֆակուլտետը։ Նրա առաջին բանաստեղծությունը` «Դեպի աստված», լույս է տեսել 1919-ին Թիֆլիսի «Փարոս» թերթում։ Սարմենը Հայկական ԽՍՀ պետական հիմնի տեքստի հեղինակն է։ Նրա բանաստեղծությունների տեքստով հայ կոմպոզիտորները ստեղծել են բազմաթիվ երգեր:
Պարգևատրվել է Հոկտեմբերյան հեղափոխության, Աշխատանքային կարմիր դրոշի, Կարմիր աստղի և «Պատվո նշան» շքանշաններով:
Մահացել է 1984թ. փետրվարի 18-ին Երևանում:
