Այսօր Ազգային Ժողովում «Վարչական իրավախախտումների վերաբերյալ ՀՀ օրենսգրքում լրացում և փոփոխություններ կատարելու մասին» օրինագծի երկրորդ ընթերցման ժամանակ ՀՀ արդարադատության փոխնախարար Գրիգոր Մուրադյանը ներկայացրեց, որ հանրային վայրերն օրենքի խախտմամբ օգտագործելու դեպքում պատասխանատվություն է սահմանվում, և անձինք չեն կարող հանրային վայրերն օգտագործել իրենց հայեցողութամբ, իսկ կանոնների խախտման առանձին դեպքերի համար պատիժներ են սահմանվում:
Միաժամանակ, փոխնախարարի ասելով՝ ոստիկանին և զինծառայողին հրապարակայնորեն վիրավորելը դիտվում է որպես վարչական իրավախախտում, և պաշտոնատարներին ու մասնավոր քաղաքացիներին հասցված վիրավորանքը տարբերակվում է:
«Սա էլիտար վիրավորանքի և նրա թանկ արժենալու մասին օրենքի նախագիծ է»,- հայտարարեց «Ժառանգություն» խմբակցության ղեկավար Ստյոպա Սաֆարյանը՝ պարզաբանելով, որ այդ օրինագծով ստացվում է, որ նույն խոսքերը տարբեր քաղաքացիների ասելու դեպքում կարելի է արժանանալ տարբեր պատիժների. «Հասկանում եք, չէ՞, թե դա ում է ուղղված: Եթե մի քիչ էլ վախեցնենք քաղաքացուն, տնից դուրս չի գա: Այս օրենքն ընտրական շրջանում օդից չի ընկել: Անհրաժեշտությունը ծագել է նրանից, որ ամեն մի բողոքի ակցիայի ժամանակ ոստիկանները և քաղաքացիները տարբեր վիճակներում են հայտնվել, որպես «չուժոյ պախմել»՝ նաև մենք»:
Ս. Սաֆարյանի բնութագրմամբ՝ օրինագծի հիմքում ընկած տրամաբանությունը ինքնին մերժելի է և լուծում չի տալիս խնդրին: Ըստ նրա՝ այն, որ մարդիկ վիրավորում են, դա ընդամենը հետևանք է:
«Հետևանքների դեմ կռիվ մի՛ տվեք, պատճառները վերացրե՛ք: Վերացրե՛ք գռեհկաբանությունը հեռուստաէկրաններից: Եթե դա նորմ է դառնում, ապա մի զարմացեք, որ դա կիրառվում է սովորական կյանքում»,- հայտարարեց Ս. Սաֆարյանը՝ հավելելով, որ խստացվող պատիժներով դա չի կանխվի, և մարդու իրավունքները, առաջին հերթին՝ բողոքի իրավունքը, կանխելու այս օրինագիծը աննպատակահարմար է:
Գ. Մուրադյանի խոսքով՝ իրեն «անկեղծորեն զարմացրեց Սաֆարյանի պաթոսը»: Նա տեղեկացրեց, որ եթե վիրավորանքի համար մինչև 1 մլն դրամ տուգանք կարող էր նշանակվել, ապա այս օրինագծով դա դառնում է մինչև 50 հազ. դրամ:
