Հայաստանի երիտասարդական հիմնադրամում այսօր տեղի է ունեցել Հայկյան մրցանակաբաշխությունը և մրցանակներ են հանձնվել 2011թ. երիտասարդական տարբեր ոլորտներում իրենց լավագույնս դրսևորած երիտասարդական և ուսանողական կառույցներին։
ՀՀ կառավարության մամլո ծառայությունից «Առաջին լրատվական»-ին տեղեկացնում են, որ «Ռազմահայրենասիրական լավագույն նախագիծ» է ճանաչվել ԵՊՀ «Երիտասարդ համալսարանականների միավորում» ՀԿ-ի «Ես քո կենդանի սուրն եմ, հայրենի´ք» ծրագիրը, «Լավագույն երիտասարդական միջազգային ծրագիր»` ԿԳ նախարարության «Բոլոնիան 2010-ից հետո ուսանողական միջազգային ամառային դպրոց» ծրագիրը, «Երիտասարդական ոլորտին առավելագույնս աջակցած միջազգային կառույց»` «Կոնրադ Ադենաուեր» գերմանական քաղաքական հիմնադրամը, «Ինքնատիպ երիտասարդական նախագիծ»` «Միասին» երիտասարդական շարժման «Շնորհավոր, սիրելի´ մայրեր» նախագիծը: «Լավագույն երիտասարդական հաղորդում» անվանակարգում հաղթել է «Ազատություն» ռադիոկայանի «Մաքսլիբերթի» երիտասարդական ծրագիրը և այլն:
Շնորհավորելով մրցանակակիրներին՝ Հայաստանի վարչապետ, Հայաստանի երիտասարդական հիմնադրամի հոգաբարձուների խորհրդի նախագահ Տիգրան Սարգսյանը համոզմունք է հայտնել, որ մրցանակները հզոր եռանդ են հաղորդելու երիտասարդներին իրենց հետագա աշխատանքներին։
