Աուտիզմով տառապող կալիֆոռնիացի դպրոցականի մայրը ադմինիստրատիվ հայց է ներկայացրել ուսուցչի դեմ, որը, ինչպես պնդում է ծնողը, դասերի ժամանակ իր որդուն ստիպել է նստել ստվարաթղթե արկղի մեջ: Այս մասին գրում է Los Angeles Times-ը:
Քիմ Ռոլինզը պնդում է, որ այդ ամենի մասին իրեն պատմել է իր 10-ամյա տղան` Սեյջը, որը սվորում է Ուայլդմոր քաղաքի Ռոնալդ Ռեյգանի անվան դպրոցում: Տղան մորից մկրատ է ուզել արկղում պատուհան բացելու համար: Տղայի խոսքով` ինքը արկղում է հայտնվել այն ժամանակ, երբ ուսուցիչը դժգոհ է եղել իրենից, երբեմն էլ ինքնակամ է մտել արկղի մեջ: Մինչ այդ ուսուցիչը տղային, որպես պատիժ, հրամայել էր նստել պահարանի մեջ:
Տղայի համար մշակված է եղել ուսուցման հատուկ ծրագիր: Նա դասարանում է գտնվել հատուկ օգնականի ուղեկցությամբ:
Դպրոցի տնօրենը, սակայն, պնդում է, որ տղային ոչ ոք չի ստիպել նստել արկղում: Նրա խոսքով` տղան մտել է արկղի մեջ այն ժամանակ, երբ ցանկացել է հանգստանալ:
Ուսուցչին, որին մեղադրել է կինը, առժամանակ ուղարկել են հանգստանալու, իսկ տղային` այլ դասարան: Ուսուցչի գործողություններում շերիֆի օգնականը հետաքննության ժամանակ անօրինական արարք չի հայտնաբերել:
