Ի պատասխան Իսպանիայում և Լատինական Ամերիկայի երկրներում իր ցանցահենների ձերբակալությունների՝ Anonymous-ը կոտրել է Ինտերպոլի կայքը,- գրում է ամերիկյան Forbes-ը:
www.interpol.int կայքը DDOS-հարձակման է ենթարկվել և 20-30 րոպե անհասանելի է եղել: Հարձակման համար պատասխանատվությունը ստանձնել են Anonymous-ի ցանցահենները:
«Կարծես թե interpol.int-ի մոտ խնդիրներ են առաջացել… Ով կարող էր սպասել»,- գրել է ցանցահեններից մեկը Twitter-ում:
Կայքի վրա հարձակումները սկսվել են այն բանից հետո, երբ ոստիկանությունը Իսպանիայում, Արգենտինայում, Չիլիում և Կոլումբիայում ձերբակալել է ցանցահենային խմբի 25 անդամները՝ Չիլիի և Կոլումբիայի կառավարական կայքերի վրա հարձակումներ գործելու կասկածանքով:
Ինտերպոլից հայտնել են, որ ոստիկանները կալանքի տակ են դրել 250 միավոր համակարգչային տեխնիկա և կասկածյալների մոտից առգրավել մեծ քանակությամբ կրեդիտային քարտեր և առձեռն գումար:
Anonymous-ն աշխարհի ամենահայտնի ցանցահենային կազմակերպությունն է: Այն ցանցահենային հարձակումներ է գործում աշխարհի տարբեր երկրների կառավարակայն կայքերի, միջազգային խոշոր բանկերի վրա: Փետրվարի սկզբին նրանց հաջողվեց շարքից հանել ԿՀՎ կայքը:
