ՕԵԿ-ի օգտին քվեարկելու է միայն Սերժ Սարգսյա՞նը

Վերջին շրջանում Սերժ Սարգսյանն անձամբ փորձում է վերակենդանացնել «Օրինաց երկիր» կուսակցությունը` այն համալրելով նոր անդամներով, նրանց որոշակի պաշտոններ և լիազորություններ տալով: «Առաջին» լրատվականի» հետ զրույցում քաղաքական տեխնոլոգիաների մասնագետ Արմեն Բադալյանը կարծիք հայտնեց, որ այդ վերակենդանացումը չի օգնի ՕԵԿ-ին, և դրանով Սերժ Սարգսյանը պարզապես փորձում է ՕԵԿ-ին օգտագործել սև գործերի համար` ՕԵԿ ձեռքերով անել այն, ինչ ինքը ցանկանում է` չկեղտոտելով ՀՀԿ ձեռքերը. «Արթուր Բաղդասարյանը մինչև 2008 թ. շատ ձայներ էր հավաքում, քանզի ուներ պայքարողի կերպար, իսկ պայքարողը երբեք չի կարող ծախվել, երբ նա ծախվում է, նրա կերպարը կոտրվում է, և հենց այդ պատճառով Բաղդասարյանը` որպես քաղաքական գործիչ, մահացավ, երբ մարտի 1-ի կրիտիկական պահին 180 աստիճանով փոխեց իր քաղաքական օրիենտացիան: Այժմ ինչ ուզում են անեն, այլևս ՕԵԿ-ը քաղաքական ապագա չունի, և նրա ճակատագիրը կախված է միայն Սերժ Սարգսյանից: Այն պահին, երբ Ս. Սարգսյանը որոշի ազատվել ՕԵԿ-ից և Արթուր Բաղդասարյանին ԱԽՔ-ի պաշտոնից հեռացնի, ՕԵԿ-ն այդ պահից կդադարի գոյություն ունենալ»:
Այդուամենայնիվ, ըստ Բադալյանի, 2012 թ. խորհրդարանական ընտրություններին ՕԵԿ-ը առանձին կազմով մասնակցելու է. «Շատ հնարավոր է, որ նրանք գնան գործարքի, որպեսզի Սերժ Սարգսյանը որոշակի տոկոսներ տա: Եթե ՕԵԿ-ը խորհրդարանական ընտրություններում ձայներ ստացավ, ապա դա զուտ Սերժ Սարգսյանի շնորհիվ է լինելու»: