Այսօր լրագրողների հետ հանդիպման ժամանակ «Անտարես հոլդինգի» տնօրեն Արմեն Մարտիրոսյանն անդրադարձավ ԱԱՀ-ի (ավելացված արժեքի հարկ) մասին օրենքում կատարված փոփոխություններին, ինչի հետևանքով էլ տեղի են ունեցել գրքի թանկացումներ: «2011 թվականի սկզբին օրենքում կատարվեց փոփոխություն, որը վերաբերում էր ներկրող կազմակերպություններին: Այն կազմակերպությունները, որոնց վաճառքը տարվա ընթացքում գերազանցում էր 1 մլն դրամը, սկսում էին վճարել ԱԱՀ: Քանի որ գրախանութներն էլ վաճառում են ոչ միայն տեղական արտադրանք, այլև ներմուծում են գրքեր, ուստի նրանք նույնպես ավտոմատ կերպով սկսեցին վճարել ԱԱՀ»,- նշեց Արմեն Մարտիրոսյանը:
Սակայն նրա հավաստմամբ՝ օրինագծում կատարված փոփոխությունները չեն ենթադրում թանկացումներ: Ուստի այդ հարցը շնորհիվ ակտիվ հասարակության չի մնացել ստվերում, ինչպես հաճախ լինում է. «Ֆինանսների նախարարությունը և հարկային դաշտի ներկայացուցիչները խոստացել են 15-օրյա ժամկետում քննարկել այս հարցը և պարզաբանումներ մտցնել օրենքի փոփոխության հետ կապված: Վաստահ եմ, որ արդյունքում չի լինելու որևէ թանկացում»:
«Բյուրոկրատ»-ի տնօրեն Հայկ Հովհաննիսյանն էլ մտահոգություն հայտնեց, որ ԱԱՀ-ի մասին օրենքում գիրքը ներկայացված է, որպես ապրանք. «Գիրքը հոգևոր-մշակութային արժեք է, մինչդեռ ԱԱՀ-ի մասին օրենքում այն հավասարեցված է սպառման համար նախատեսված մյուս բոլոր ապրանքներին: Մենք առաջարկում ենք, որ օրենքում կատարվի բացառություն, ինչի հիման վրա գիրքը կազատվի ԱԱՀ-ից»:
Արմեն Մարտիրոսյանը որպես օրինակ բերեց նաև միջազգային փորձը: Մասնավորապես այն, որ Գերմանիայում ԱԱՀ-ն 19 տոկոս է, սակայն այդ օրենքում գիրքը որպես հոգևոր արժեք վճարում է 9 տոկոս: Սլովենիայում և Ուկրաինայում առհասարակ 0 տոկոս է կազմում. «Սակայն երբ դիմեցինք Ֆինանսների նախարարություն ասացին, որ Բելառուսում և Ադրբեջանում 20 տոկոս է: Ուստի մենք առաջնորդվելու ենք դրանով: Իսկ ինչու պետք է մեր կառավարությունը նման հարցերում առաջնորդվի Ադրբեջանի փորձով: Մենք ի՞նչ է՝ չե՞նք կարող ավելի լուրջ երկրների փորձին հետևել»,- մտահոգություն հայտնեց Արմեն Մարտիրոսյանը:
Արձակագիր Արամ Պաչյանն էլ ավելացրեց, որ իրենք նամակ են պատրաստել վարչապետին ուղղված, որով պահանջելու են հանել 20 տոկոս ԱԱՀ-ն: Իսկ թե հետագայում ինչ են պատրաստվում անել՝ կախված է միայն նամակի պատասխանից: Սակայն ամեն ինչ անելու են, որպեսզի հասնեն հաջողության:
Վերջում Արմեն Մարտիրոսյանը նշեց, որ այսօր կան թղթի տեսակներ, որոնք ազատված են ԱԱՀ-ից. լրագրի թուղթը, որպես ինֆորմացիայի ազատության ապահովման միջոց, ծխախոտի թուղթը, ցեմենտի պարկերի համար նախատեսված թուղթը: Իսկ ինչու չի կարող նման արտոնություններից օգտվել գիրքը: Պարզապես մեր պետությունը լավ չի վերաբերվում գրքին: Վառ ապացույցն այն է, որ եթե ամբողջ աշխարհում ընթերցանության մակարդակը նվազել է 1 տոկոսով, ապա մեր երկրում՝ 90»:
